मायावीको प्रिमियरमा जग्गेबाट भागेको बेहुला कुरेकी बेहुली झैँ भइन् दीपिका

काठमाडौँ  : फिल्म ‘मायावी’को ग्राण्ड प्रिमियर समारोहमा दुलही झैँ सिँगारिएर आइन् अभिनेत्री दीपिका प्रसाईँ। रातो सारी घुम्टोसहित, रातै ब्लाउज, गहना अनि रातै ब्याग। हातमा औँठी लगाएकी थिइन् उनले।

तर हालत बिहेको दिन जग्गेबाट भागेको दुलाहा कुरेर बसेको दुलही जस्तो भयो उनको। फिल्मको मुख्य अभिनेता पल शाह प्रिमियरमै आइदिएनन्। रिलकै लागि भए नि दीपिकाको सिँगार पलकै लागि थियो। तर काम लागेन।

४ बजे प्रिमियर भनिए पनि ६ बजे बल्ल सुरु भएको थियो। प्रिमियरमा फिल्मको मुख्य कलाकार आउने अपेक्षा सामान्य नै हो। तर  ६ बज्दा पनि पल आएनन्।
फिल्म सुरु भएपछि आउलान् नि भन्ने खाल्का तर्क पनि सुनिन्थ्यो। तर पल आफ्नो फिल्मको ग्राण्ड प्रिमियरमा आएनन्।
बरु उनको सहयात्री जुरी ठाकुर पुगेका थिए। युट्युबका लागि मसला राम्रै हुन्छ पुगेका युट्युब पत्रकारहरू भ्युजको घानका लागि पुण्य गौतमको इन्टर्भ्यूले चित्त बुझाउन थाले। उनी पनि आफूलाई पलले पठाएको भन्दै गफ जोतिरहेका थिए।

बल्ल अभिनेत्री प्रसाईँले पलले आफूलाई मेसेज गरेर अर्को फिल्ममा रहेकाले आउन नसकेको बताएको दाबी गरिन्। तर कुन फिल्ममा, कहाँ भन्ने खुलाइनन्। पल पश्चिम जिल्लामा ओमप्रतिकको फिल्म ‘मोहर’ को सुटिङमा रहेको गाइँगुइँ मात्र चल्यो।

दिवाकर भट्टराईको लेखन तथा निर्देशनमा बनेको फिल्मलाई शुभकामना दिन अभिनेता राजेश हमाल आएका थिए। दिवाकर कै फिल्म ‘नरसिंहा’बाट कमब्याक गर्न लागेका हमालले पुरा समय फिल्म हेरे अनि प्रतिक्रिया पनि दिए।

फिल्म हेर्दा श्रीमती मधु कतिको मिस भयो त दाइ भनेर प्रश्न आइहाल्यो। हमालले पत्रकारको प्रश्नमा धेरै मिस गरेको र फिल्म रिलिजपछि सँगै हेर्न लैजाने भन्दै जोक्स सुनाए।

फिल्म बुधवारबाट रिलिज हुँदैछ। प्रिमियरमा पुगेकाले झुरै फिल्मलाई पनि बबाल भनेर प्रशंसा गरिहाल्छन्। यसको पनि प्रशंसै भयो। जेल, अदालतको यात्रापछि पलले खेलेका फिल्म टुस पाराले फ्लप भइरहेका छन्। निर्मातालाई दशै बराबर देखिएकै हो। अब मायावीमा भट्टराइले दशा काट्ने हुन् यो हैनन्, माहौल हेर्दा फ्याट्ट भनिहाल्न सकिने अवस्था छैन।

त्यसमा पनि फिल्म कुमार कट्टेलको ‘लाज शरणम्’ र सुपुष्पा भट्ट अभिनीत फिल्म ‘फेरि रेशम फिलिली’सँग भिड्दैछ। अनि कसरी भन्न सकिन्छ त।

फिल्ममा पल र दीपिका बाहेक सुशिल सिटौला,राजाराम पौडेल,करिश्मा श्रेष्ठ लगायतका कलाकार पनि छन्। ती प्रिमियरमा पुगेका थिए।  

फागुन १३, २०८१ मंगलबार ००:२९:५५ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।