शसस्त्रको ब्यारेकभित्रै मृत भेटिएकी इन्स्पेक्टर महतको पोष्टमार्टम गरियो

पोखरा : पोखरास्थित हुल तथा दंगा व्यवस्थापन तालिम शिक्षालय लामापाटनमा मृत अवस्थामा भेटिएकी सशस्त्र प्रहरी निरीक्षक (इन्स्पेक्टर) सन्तोषी महतको पोष्टमार्टम भएको छ।

सशस्त्र प्रहरी बलमा कार्यरत  सिन्धुपाल्चोक घर भएकी २८ वर्षीया महतको शव शनिबार राति नौ बजे ब्यारेकको महिला शौचालय नजिकको बीममा झुण्डिएको अवस्थामा भेटिएको थियो।

महतको शवको त्रिवि शिक्षण अस्पतालमा पोष्टमार्टम गरिएको सशस्त्र प्रहरी बलका प्रवक्ता (डीआईजी) कुमार न्यौपानेले जानकारी दिए।

उनले भने,‘उनको शवको पोष्टमार्टम भएको छ। शव अस्पतालमै छ। शसस्त्र आन्तरिक छानविन समितिले काम गरिरहेको छ, घट्नाबारे अहिले केही भन्न सक्ने अवस्था छैन।’

न्यौपानेका अनुसार मृतकका परिवारबाट किटानी जाहेरी पर्ने भन्ने सुनेको तर जाहेरी परिनसकेको जानकारी दिए। घटनाको थप अनुसन्धान नेपाल प्रहरीले गरिरहेको पनि उनले बताए।

घटना अनुसन्धान गर्न सशस्त्र प्रहरी बल प्रधान कार्यालयले डीआईजीको नेतृत्वमा छानबिन समिति गठन गरेको छ। एकेडेमीका डीआईजी लक्ष्मण सिंहको नेतृत्वमा समिति गठन गरिएको प्रवक्ता न्यौपानेले बताए।

सशस्त्र प्रहरी जवान र असई हुँदै उनी इन्स्पेक्टर भएकी थिइन्। प्रेम सम्बन्धका कारण उनले आत्महत्या रोजेको आशंका गरिएको छ। जवानमै हुँदा २०७८ सालमा असईमा नाम निकालेकी उनले २०८१ मा निरीक्षकमा नाम निकालेकी थिइन्।

फागुन १२, २०८१ सोमबार ११:३४:४२ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।