नक्कली आलमसहित फिल्म ‘लाज शरणम्’को सेन्सर पास, पायो ‘युनिभर्सल सर्टिफिकेट’

काठमाडौं : उच्च अदालतले कांग्रेस नेता मोहम्मद आफताब आलमको क्यारिकेचर गरेको सीताराम कट्टेलको भूमिकाको प्रचारप्रसार गर्न रोक लगाएको चलचित्र ‘लाज शरणम्’लाई सेन्सर बोर्डले ग्रिन सिग्नल दिएको छ।

चलचित्र विकास बोर्डको जाँचपास समितिले प्रदर्शनका लागि ‘युनिभर्सल प्रमाणपत्र’ दिएसँगै फिल्म रिलिजबारे देखिएको अन्योल समेत अन्त्य भएको छ। फिल्म दुई घण्टा ४० मिनेटको छ।

नेपालमा चलचित्र जाँचपास समितिले सेन्सर गरिएका चलचित्रलाई तीन किसिमको प्रमाणपत्र दिनेगर्छ। युनिभर्सल प्रमाणपत्र पाएका फिल्म सबैले हेर्न पाइन्छ भने ‘पीजी प्रमाणपत्र’ पाएका फिल्म बालबालिकाले अभिभावकको निगरानीमा र एडल्ट फिल्म १८ वर्षभन्दा माथिकाले मात्र हेर्न पाउँछन्।

शुक्रबार सञ्चार तथा सूचना प्रविधि मन्त्रालयमा फिल्मको जाँच गरिएकोमा फिल्मसँग सम्बन्धित केही कुराहरू मिलाउनुपर्ने भन्दै टोलीलाई आइतबार पनि बोलाइएको थियो।

फिल्मको जाँचअघि शुक्रबार सञ्चार मन्त्रालयमा बोर्ड पदाधिकारीहरूको बैठक बसेको थियो। सो बैठकसँगै सबै सदस्यले फिल्मको स्क्रिप्ट अध्ययन गरेका थिए। स्क्रिप्ट अध्ययनको क्रममा पनि फिल्मको विषयवस्तु सामान्य नै पाइएको बताइएको थियो।

पूर्वमन्त्री अफताव आलमले आफूजस्तो देखिने चरित्र चित्रण गरेको भन्दै फिल्मविरुद्ध पाटन उच्च अदालतमा निषेधाज्ञाको रिट दायर गरेका थिए। आलमको रिटमा सुनुवाइ गर्दै अदालतले सेन्सरअघि फिल्ममा आलामको क्याचिकेचर गरिएको सीतारामको भूमिकाको प्रचारप्रसार नगर्न र नगराउन आदेश दिएको थियो।

अदालतले फिल्मको मुख्य जाँच गर्ने अधिकार सेन्सर बोर्डलाई भएको भन्दै रिलिजको विषयमा सेन्सर बोर्डको निर्णय नै अन्तिम हुने बताएको थियो।

अदालतको आदेशपछि नेपाल चलचित्र निर्देशक समाजले फाट्टफुट्ट आएका प्रचार सामग्रीको भरमा उच्च अदालत पाटनले चलचित्रमाथि अंकुश लगाउने आदेश दिएको आरोप लगाएको थियो।

कुमार कट्टेलले निर्देशन गरेको फिल्ममा अर्जुन घिमिरे, सागर लम्साल, हरि निरौला, सीताराम कट्टेल, विजय बराल लगायतका कलाकारहरूको मुख्य भूमिका छ।

फागुन ११, २०८१ आइतबार ११:३६:२७ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।