च्याम्पियन्स ट्रफीमा आज भारत र पाकिस्तान भिड्दै
एजेन्सी : च्याम्पियन्स ट्रफीमा दोस्रो राउण्डको पहिलो खेलमा भारत र पाकिस्तान भिड्दैछन्।
खेल युएईको दुबई अन्तर्राष्ट्रिय क्रिकेट स्टेडियममा नेपाली समय अनुसार दिउँसो २ः४५ बजे सुरू हुनेछ। भारतले पाकिस्तानमा खेल्न अस्वीकार गरेपछि उसका सबै खेल युएईमा भइरहेको छ।
पाकिस्तानले गत संस्करणको फाइनलमा भारतलाई नै पराजित गरेको थियो। पाकिस्तान १ सय ८० रनको जित निकाल्दै च्याम्पियन बनेको थियो।
पहिलो खेलमा न्युजिल्याण्डसँग फराकिलो अन्तरले पराजित भएको पाकिस्तानले सेमिफाइनल सम्भावनालाई जीवित राख्न आजको खेलमा जित्नैपर्ने हुन्छ।
पहिलो खेलमा बंगलादेशलई हराएको भारत यो खेल जितेर सेमिफाइनल सम्भावना बलियो बनाउन चाहन्छ।
पाकिस्तानसँगको पछिल्लो ओडिआई भेटमा भारत विजयी भएको थियो। सन् २०२३ मा आईसीसी पुरुष क्रिकेट विश्वकपमा भारतले पाकिस्तानलाई ७ विकेटले पराजित गरेको थियो।
भारत र पाकिस्तानबीच भएका विश्वकप, च्याम्पियन्स ट्रफी र एसिया कपका पछिल्ला ११ ओडिआई खेलमध्ये ९ मा भारतले तथा ३ मा पाकिस्तानले जितेको छ।
च्याम्पियन्स ट्रफीमा भारत र पाकिस्तानबीच ५ खेल भएका छन्। जसमा पाकिस्तानले सन् २०१७ को फाइनलसहित ३ खेलमा जितेको थियो।
फागुन ११, २०८१ आइतबार १०:०७:४१ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
