ट्रम्पद्वारा सेना प्रमुख चार्ल्स सीक्यू बर्खास्त, ‘ब्ल्याक लाइभ्स म्याटर’ अभियानको गरेका थिए समर्थन

एजेन्सी : अमेरिकी राष्ट्रपति डोनाल्ड ट्रम्पले देशका शीर्ष सैन्य अधिकारी चार्ल्स सीक्यू ब्राउन जूनियरलाई बर्खास्त गरेका छन्। उनी सेनाको ‘संयुक्त प्रमुख कर्मचारी’ (जेसीएस)का अध्यक्ष थिए।

‘संयुक्त प्रमुख कर्मचारी’ संयुक्त राज्य अमेरिकाको रक्षा विभागका सबैभन्दा वरिष्ठ सैन्य नेताहरूको समूह हो। यो समूहले राष्ट्रपति, रक्षा सचिव, गृह सुरक्षा परिषद् र राष्ट्रिय सुरक्षा परिषद्लाई सैन्य मामिलामा सल्लाह दिन्छ।

२०२० मा सीक्यूले ‘ब्ल्याक लाइभ्स म्याटर’ आन्दोलनलाई सार्वजनिक रूपमा समर्थन गरेका थिए। यो आन्दोलन अश्वेत व्यक्ति जर्ज फ्लोयडको हत्या पछि सुरु भएको थियो। त्यतिबेला सीक्यू वायुसेनाका प्रमुख थिए।

त्यतिबेला ट्रम्प राष्ट्रपति थिए। २०२० को चुनावमा ट्रम्पको पराजयमा यो आन्दोलनले प्रमुख भूमिका खेलेको मानिन्छ। न्यूयोर्क टाइम्सको रिपोर्ट अनुसार, ट्रम्पले चार्ल्स सीक्यू ब्राउन जूनियरबाहेक रक्षा विभागका थप पाँच अधिकारीहरूलाई बर्खास्त गरेका छन्।

यसमा नौसेनाको जिम्मेवारी सम्हाल्ने पहिलो महिला अधिकारी एडमिरल लिसा फ्रान्चेट्टी, वायुसेना उपप्रमुख जेम्स स्लाइफ, साथै सेना, वायुसेना र नौसेनाका तीन शीर्ष वकिलहरू समावेश छन्। हाल उनीहरूको नाम खुलासा गरिएको छैन।

अमेरिकामा सरकार परिवर्तन भएपछि जेसीएस अध्यक्ष परिवर्तन गर्ने कुनै अभ्यास छैन। चार वर्षको कार्यकालको लागि नियुक्त भएका उनले दुई प्रशासनबीच पुलको रूपमा काम गर्ने गरेका थिए। तर सीक्यू भने नियुक्त भएको १६ महिना मात्र पदमा रहन सके।

अमेरिकी सैन्य इतिहासमा यो पदमा पुग्ने सीक्यू दोस्रो अश्वेत अधिकारी थिए। उनी फोर स्टार लडाकु हुन्। सीक्यूको सट्टा ट्रम्पले सेवानिवृत्त थ्री स्टार वायुसेना जनरल डान केनलाई जेसीएसको अध्यक्ष पदको जिम्मेवारी दिएका छन्।

ट्रम्प र डान केन २०१८ मा इराकमा भेटेका थिए। त्यसपछि केनले ट्रम्पको लागि आफ्नो ज्यान पनि दिन सक्ने बताएका थिए। त्यसबाट धेरै खुसी रहेका ट्रम्पले पछि बाइडेन प्रशासनले ड्यान केनलाई उनको कारणले बढुवा नगरेको आरोप लगाएका थिए।

यसअघि अमेरिकी रक्षामन्त्री पिट हेगसेथले पदभार ग्रहण गर्नुअघि नोभेम्बरमा सीक्यू ब्राउनलाई हटाउने संकेत गरेका थिए। उनले अमेरिकी सेनामा विविधता र समानता समाप्त गर्नुपर्ने र सबैभन्दा पहिले संयुक्त चिफ अफ स्टाफका अध्यक्षलाई हटाउनुपर्ने बताएका थिए। सीक्यूलाई बर्खास्त गरेपछि उनको त्यो अभिव्यक्ति पनि भाइरल बनिरहेको छ।

फागुन १०, २०८१ शनिबार १२:३२:२९ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।