माग्ने बुढाकै फोर्सले फिल्म 'होस्टेल ३' खेलेका हुन् धुन्धुकारिले?

काठमाडौं : एक दशक अघि हास्य टेलीश्रृंखला ‘मेरी बास्सै’का धन्धुकारिका रूपमा परिचित बाल कलाकार आशिष् घिमिरे हुर्किसकेका छन् अहिले। त्यो बेलामा उनका बुबा मेरी बास्सैका लेखक तथा निर्देशक भएकैले बाल कलाकारका रूपमा अभिनय गर्ने मौका पाएका थिए उनले। धुन्धुकारि चरित्रबाट उनी चर्चामा पनि आए।

उनै आशिषलाई अब दर्शकले हिरोका रूपमा फिल्म ‘होस्टेल ३’मा देख्नेछन्। यो उनको डेब्यु फिल्म हो।

उनका बुबा केदार घिमिरे ‘माग्नेबुढा’ र उनकी आमा सीतादेवी तिमल्सेना पनि कलाकारितामै छन्। माग्नेबुढाका उपनामले केदार ठुला ब्यानरका फिल्ममा महँगो पारिश्रमिक लिएर अभिनय गर्दै आएका छन् भने सीता हास्य टेलिश्रृंखला ‘सक्किगोनी’मा चन्द्रमुखीको भूमिका निवार्ह गर्दै आएकी छन्।

घरका परिवारै फिल्म लाइनमा रहेको बेला उनकी छोरी भने यो लाइनमा आउन नचाहेको सीताले केही समय अगाडि बताएकी थिइन्।

टेलिश्रृंखलामा छोरालाई अभिनय गराएका केदारले फिल्मका लागि कतै फोर्स गरेका त हैनन् ? आशिष् बुबाले फिल्ममा आउन फोर्स गरेको भए नखेल्ने मुडमा रहेको बताए। आफ्नो डेब्यु फिल्म ‘होस्टेल ३’को ट्रेलर रिलिज कार्यक्रममा आमासँगै उपस्थित भएका आशिषले बुबाले फिल्म खेल्न फोर्स नगरेको अनि माग्नेबुढाको छोरा भन्दा पनि आफ्नै परिचय स्थापित गर्न अभिनयमा लागेको बताए। उनले यसो भने पनि फिल्मको ट्रेलरमा उनको चरित्र हास्यप्रधानै देखिन्छ।

पत्रकारसँगको कुराकानीमा भने,‘बुवाले मलाई फिल्म खेल्न फोर्स गर्नु भएको थिएन। म पढिरहेको र अन्त जागिर खाइरहेको मान्छे हो। तर दर्शकको मायाले गर्दा नै मुभीमा आएको हो। बुबाको फोर्सले भएको भए सायद म फिल्म लाइनमा आउँदिन थिए होला।’

यो फिल्ममा अधिकांश नयाँ अनि सामाजिक सञ्जालका इन्फुयन्सरहरु नै कलाकारका रुपमा छन्। अधिकांशको यो डेब्यु फिल्म नै हो। फेसबुकमा भिडियो बनाएर चर्चामा आएका सिक्किमका कमेडियन पदम तामाङदेखि टिकटकर कुलब्वाई (पारस बम ठकुरी) सम्मको अभिनय छ यसमा।

उनीहरूका अलवा सिम्रन पन्त, हेना नगरकोटी, रिहान गिरी,समा पराजुली लगायत सामाजिक सञ्जालमा चर्चामा रहेका कलाकारहरूकै बाहुल्यता छ फिल्ममा।

यो फिल्ममा अभिनेता प्रवीण खतिवडा वार्डेनको भूमिकामा छन्। दर्जनौँ म्युजिक भिडियो निर्देशन गरेका सशान कँडेलको यो फिल्म डेब्यु निर्देशन हो।

फागुन ९, २०८१ शुक्रबार २२:५०:१२ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।