'भूठान' टिजर : ‘ह्यापियस्ट कन्ट्री’को ‘अनह्यापी’ नागरिकको कथा
काठमाडौँ : भुटानका नागरिकको परिचय विश्वका लागि सबैभन्दा धेरै खुसी भएको देश हुनसक्छ। भारतका लागि भारत-भुटान सम्बन्ध बिगार्नसक्नेहरु अनि केही नेपालीका लागि अमेरिका छिर्न सकिने परिचय।
सत्ताको आँखी हुँदा एक लाख बढी भुटानीहरू आफ्नै देशबाट लखेटिए। भारतले सम्बन्ध बिग्रने डरले उनीहरूलाई नेपालको सीमाभित्र ल्याएको छाडिदियो। उनीहरूको नेपाल सम्बन्ध भाषा र पुर्खा बाहेक अन्य थिएन। तर तिमिहरूकै देश फर्की भनेर उनीहरूलाई नेपालमा ल्याएर छाडियो।
नेपालमा राखिएका शरणार्थीहरूमध्ये अधिकांश तेस्रो देश पुनर्वासको कार्यक्रम अनुसार अधिकांश अमेरिका पुगे अन्य युरोप लगायतका देश।
उनीहरू नेपालमा रहँदा पनि देशहीन थिए, अमेरिका लगायतका देशमा पुग्दा पनि देशहीनै छन्। देशहीन हुनुको पिडा ‘ह्यापिएस्ट कन्ट्री’ को ट्यागले मेटाउन सकेको छैन।
यही कथामा केन्द्रित भएर बनेको फिल्म 'भूठान' को टिजरमा यही पक्षलाई महत्त्व दिइएको छ। हरिवंश आचार्य निकै फरक चरित्रमा देखिन्छन् टिजरमै।
विश्वको सबैभन्दा धेरै खुसी नागरिक बस्ने देशले अनागरिक बनाउँदा गढेको मानसिक तनावले ग्रस्त पात्रको भूमिकामा देखिएका छन् उनी। उनी अमेरिका पुगेका छन्। तर खुसी छैनन्। उनी आफ्नो देश फर्कने प्रयासमा छन् तर सकेका छैनन्।
विनोद पौडेलको निर्देशनमा बनेको फिल्ममा नेपाली कलाकारसँगै हलिउडका अभिनेता ब्रुस डर्नले समेत अभिनय गरेका छन्। टिजरमा समावेश दृश्य अनुसार यसमा समलैंगिक सम्बन्धलाई समेत छोएको देखिन्छ।
फिल्ममा हरिवंश र ब्रुससँगै दयाहाङ राई, अनुराधा मजुमदार, पूजा चन्द, ऋचा घिमिरे, जोएस पाण्डे, अदिति प्याकुरेल, टम क्रेन लगायतको अभिनय रहेको छ।
विनोदको निर्देशन रहेको फिल्मको छायाँकन सुशन प्रजापतिले गरेका हुन्। सम्पादक अन्जय खड्का र सङ्गीतकार सम्बरन प्रेथु राई हुन्।
यसका लगानीकर्तामा अविरल थापा, राजेन्द्र ठकुराठी, अमिताव जोशी, सुशांक मैनाली, किर्तना बास्कोटा हुन्। कार्यकारी निर्मातामा विकास भिटो अधिकारी, कौशिला खनाल, रमेश भट्ट, अपार श्रेष्ठ, भुवन प्याकुरेल छन्। यसको सह-निर्माता जोयस पाण्डे, प्रदीप शर्मा, राजु पौडेल, रविन पोखरेल र नवराज पराजुली छन्। फिल्म वैशाख १२ मा रिलिज हुँदैछ।
फागुन ९, २०८१ शुक्रबार १४:११:५३ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
