सुपुष्पा र दीपिकालाई कमब्याक गर्न घरकै भर
काठमाडौं : बलिउडमा बेस्सरी चर्चा पाएको ‘नेपोटिजम’को विषय नेपाली चलचित्र क्षेत्रमा पनि बेला बेलामा उठ्ने गरेको छ।
आफ्ना आफन्त र प्रियजनलाई फिल्ममा लिनका लागि कलाकारहरूलाई फिल्ममा नलिएर कामै नगर्नेसम्मका विषय पनि नौलो रहेनन् अब फिल्म वृत्तमा।
यसैबीच आगामी फागुन १४ गते महाशिवरात्रीका दिनबाट प्रदर्शनमा आउन लागेको फिल्म ‘फेरि रेशम फिरिरि’ र ‘मायावी’का नायिकाका विषयमा फिल्म वृत्तमा चर्चा छ।
फिल्म ‘फेरि रेशम फिरिरि’की नायिका सुपुष्पा भट्ट सोही फिल्मका निर्माता रौनक कँडेलकी श्रीमती हुन्। अर्कातर्फ चलचित्र ‘मायावी’की नायिका दीपिका प्रसाईं सोही फिल्मका निर्देशक दिवाकर भट्टराईकी श्रीमती हुन्।
दुवै नायिकाले केही फिल्ममा गरिसकेपछि फिल्मका निर्माता र निर्देशकसँग विवाह गरे। सुपुष्पा र दीपिकाले विवाहपछि मुख्य भूमिकामा रहेर एउटा फिल्ममा पनि काम गरेकी छैनन्।
‘छ माया छपक्कै’, ‘चपली हाइट ३’ लगायतका फिल्ममा काम गरेकी सुपुष्पा विवाहपछि भने श्रीमानकै फिल्म ‘दिमाग खराब’को एउटा गीतमा झुलुक्क देखिएकी थिइन्।
उता नायिका दीपिकाको पनि अवस्था उस्तै हो। विवाहपछि दर्शकले नोटिस गर्नेगरी उनी पनि फिल्ममा देखिएकी छैनन्। फिल्म ‘ऐश्वर्य’बाट डेब्यु गरेकी नायिकाले त्यसपछि ‘छक्का पञ्जा ३’मा अभिनय गरेकी थिइन्।
दीपिका र दिवाकरको अहिले एक सन्तान छ।
विवाहपछि सुपुष्पा र दीपिकाले काम नपाएका हुन् वा गर्न नचाहेका हुन् उनीहरू नै जानुन् तर कमब्याकका लागि भने श्रीमानकै फिल्मको सहारा लिनुपरेकै देखिन्छ।
जे होस्, श्रीमानकै फिल्ममा मुख्य भूमिकामा देखिएर भए पनि सुपुष्पा र दीपिकाले कमब्याक राम्रो होस्। दर्शकले उनीहरूको फिल्म रुचाउन् अनि उनीहरू पनि घरबाहिरको फिल्ममा पनि देखिउन्, शुभकामना।
फागुन ८, २०८१ बिहीबार १५:००:१६ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
