सुर्खेत पुगेर शेखरको उद्घोष- ‘सभापति उठ्ने घोषणा गरिसकेँ, ११ भाइको सक्रियताले फरक पर्दैन’
सुर्खेत : नेपाली कांग्रेसका नेता डा. शेखर कोइरालाले १५औं महाधिवेशनमा सभापति उठ्ने घाेषणा गरिसकेको बताएका छन्।
बिहीबार सुर्खेतमा पार्टी कार्यकर्ता भेटघाटमा पुगेका कोइरालाले ११ भाइको सक्रियताले आफू महाधिवेशनमा सभापतिमा उठ्ने कुरामा फरक नपर्ने प्रतिक्रिया दिए।
पार्टी सभापति शेरबहादुर देउवा निकटका ११ नेताले गत शुक्रबार १५औं महाधिवेशनको रणनीतिबारे छलफल गरेकाे विषयलाई संकेत गर्दै उनले यस्ताे बताएका हुन्।
‘१५औं महाधिवेशनमा सभापतिमा उम्मेदवारी दिने घोषणा मेले गरिसकेको छु,’ उनले भने, ‘११ भाइको सक्रियताको कुरा उठ्यो, १४औं महाधिवेशनमा पनि उहाँहरूले देउवालाई सर्पोट गरेकै हो। त्यसैले मलाई फरक पर्दैन।’
उनले पार्टीको महाधिवेशन निर्धारित मितिमै हुनुपर्ने भन्दै २०८२ साल मंसिरमा गर्न कांग्रेस कार्यकर्ताले दबाब सृजना गर्नुपर्ने बताए।
‘महाधिवेशन २०८२ मंसिरमा हुनुपर्छ, मैले केन्द्रीय समितिमा राखिरहेको छु,’ उनले थपे, ‘केही अप्ठ्यारो पर्यो भने एक वर्ष थप्ने व्यवस्था विधान र संविधानले ६ महिना थप्ने व्यवस्था छ।’
पछिल्लो समय नेता काेइराला विभिन्न जिल्लाहरूमा नेता कार्यकर्ता भेटघाटमा व्यस्त छन्।
फागुन ८, २०८१ बिहीबार १४:१०:०१ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
