युएसएडको पैसा खाएर नेपालमा नास्तिकता फैलाएको आरोपबारे बोले मह जोडी

काठमाडौं : हास्य कलाकारद्वय मदनकृष्ठ श्रेष्ठ र हरिवंश आचार्य(मह जोडी)ले युएसएडको पैसा खाएर नास्तिकता फैलाएको आरोपको खण्डन गरेका छन्।

बिहीबार विहान एक भिडियो सन्देश जारी गर्दै उनीहरूले आफूहरूलाई प्रस्ताव आएकामध्ये छानेर राम्रा कामहरू मात्र गरेको दाबी गरेका छन्।

‘संसारमा राम्रा र नराम्रा दुवै कुराहरू छन्। हामीले राम्रो-राम्रो कुराहरूमात्र छानेर काम गर्दै आइरहेका छौँ,’ मदनकृष्णले भने, ‘जस्तै- कुष्ठरोग, क्षयरोग र खोपसँग सम्बन्धित कुराहरू।’

युएसएडको तर्फबाट आफूहरूले ‘मदनबहादुर हरिबहादुर’, ‘आमा’, ‘असल लोग्ने’ र विभिन्न खोपका कार्यक्रमहरू गरेको भन्दै हरिवंश आचार्यले युट्युबमा खुला रुपमा राखिएको भन्दै त्यसलाई पल्टाएर हेर्न आग्रह समेत गरे।

‘त्यहाँ कहीँ पनि सनातन हिन्दु धर्म, बुद्ध धर्म र अन्य कुनै धर्मको हामीले विरोध गरेका छैनौं,’ आचार्यले भने, ‘र अरु धर्म लिनुपर्छ भनेर उकासेका पछि छैनौं। यो अनर्गल प्रचार हो।’

मह जोडीले २०५२ सालमा गरेको ‘पञ्चायत व्यवस्थाको सराद्धे’ भन्ने कार्यक्रम गरेको पण्डितको शैलीको बारेमा समेत प्रष्टीकरण दिएका छन्।

‘पण्डित पात्रको प्रवृत्तिमाथि हामीले व्यङ्ग गरेका छौँ,’ आचार्यले भने, ‘पण्डित भन्दै भगवान हुँदैन। म पनि पण्डितकै छोरा हुँ। व्यङ्ग्य भनेको नेता, पण्डित, पुलिस, डाक्टर, वकिल सबैलाई गर्न पाइन्छ।’

सोही कार्यक्रमको एक टुक्रा राखेर सनातन धर्मको विरोध गरेको भन्दै भ्रम फैलाइएकोमा आफूहरूको चित्त दुखेको बताएका छन्।

दुई वटा चलचित्रमा काम गरिरहेका मह जोडीले कपोलकल्पित र भ्रमित कुराहरूबाट भ्रममा नपर्न आग्रह गर्दै यस्ता विषयले आफूहरू विचलित र हतोत्साही नहुने समेत बताए।

पछिल्लो समय अमेरिकी सरकारले युएसएडबाट बाहिरिएको खर्च विवरण र ती रकम लिनेहरूको सूची सार्वजनिक गर्दा मदनकृष्ण र हरिवंशको संस्था महसञ्चार पनि जोडिए पछि उनीहरूले नास्तिकता फैलाएको आरोप छ।

फागुन ८, २०८१ बिहीबार ०९:२३:४७ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।