‘अधिक हिंसात्मक दृश्य’का कारण भएन ‘ताण्डवम्’को सेन्सर, ग्राण्ड प्रिमियर नै रोकियो

काठमाडौँ : अति हिंसात्मक दृश्य राखेको भन्दै सेन्सर बोर्डले प्रदर्शनको अनुमति नदिँदा फिल्म ‘ताण्डवम्’को प्रिमियर हुन सकेन। मङ्गलवार केन्द्रीय चलचित्र जाँच समिति (सेन्सर बोर्ड)का सदस्यले फिल्म हेरेपछि अत्यधिक हिंसात्मक दृश्य रहेको भन्दै फिल्मबाट ती दृश्य हटाए मात्र प्रसारण अनुमति पाउने बताएपछि बुधवारका लागि राखिएको प्रिमियर शो नै स्थगित भयो।

आगामी शुक्रवार प्रदर्शन मिति तोकेको फिल्म निर्माण टिमले बुधवार पत्रकार तथा फिल्मकर्मीहरूलाई बुधवार प्रिमियर शो हेर्न निम्ता गरेको थियो। तर फिल्मको सेन्सर नै पास भएन। प्रिमियरै रोकियो।

उकेरासँगको कुराकानीमा फिल्मका निर्देशक जुनिम गहतराजले फिल्मको मर्म मर्नेगरि सेन्सर बोर्डका सदस्यहरूले फिल्मको दृश्य सम्पादन गरेर ल्याउन निर्देशन दिएको बताए।

‘फिल्मको प्रदर्शन रोकिएको होइन। मङ्गलवार सेन्सर बोर्डका सदस्यले फिल्मको केही दृश्यहरू हटाएर ल्याउनु भनेको हो,’उनले भने,‘केही दृश्यहरू अत्यधिक हिंसात्मक भयो भन्ने कुरा छ।’

उनले सेन्सर बोर्डको निर्देशन अनुसार फिल्मको पुन सम्पादन गर्दा कति दृश्य काटिन्छन् एकिन नभएको बताए। सेन्सरको निर्देशन अनुसार फिल्म पुन सम्पादन गर्दा जे उद्देश्यका लागि फिल्म बनाएको हो त्यसको मर्म नै मर्ने उनले दाबी गरे।

‘मैले जुन मर्म,कथा फिल्ममार्फत प्रस्तुत गर्न लागेको हो। त्यो नै काटिएपछि फिल्मको मुख्य कुरा नै काटिने भयो,’उनले भने।

सेन्सर बोर्डले प्रसारण अनुमति नदिएपछि एडल्ट सर्टिफिकेटका लागि अनुरोध गर्दा पनि नमानेको उनको दाबी छ। उनले फिल्मको प्रदर्शन नरोकिने र बोर्डका आग्रह अनुसार नै दृश्य काट्ने बताए। 

फागुन ७, २०८१ बुधबार १९:३२:०२ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।