सक्कली आलमको निवेदनले रोकियो लाज शरणमको नक्कली आलमको प्रचार

काठमाडौं : नेपाली फिल्मका विषय एकपछि अर्को गर्दै अदालत पुग्नेक्रममा रिलिजको चरणमा रहेको ‘लाज शरणम्’ पनि अदालती झमेलामा परेको छ। महाशिवरात्रि पारेर फागुन १४ मा रिलिज मिति तोकेर निर्माण टिम तीव्र प्रचारमा छ। उता उच्च अदालत पाटनले भने तत्काल फिल्मको प्रचार लगायतका गतिविधिको कामै रोकिदियो।

मंगलबार अन्तरिम आदेश जारी गर्नुको कारण देखियो पूर्व मन्त्री मोहम्मद अफताब आलमको गेटअप। फिल्ममा सीताराम कट्टेल आलमको गेटअपमा छन्। निर्माण टिमले यसलाई फिल्मको प्रचारमा राम्रै प्रयोग गरिरहेको थियो। पोस्टरदेखि गीतसम्मै आलमको गेटअपमा कट्टेल देखिएपछि सक्कली आलम उच्च अदालत पुगे। आलमले पाटन उच्च अदालतमा अन्तरिम आदेश माग गर्दै दायर गरेको निवेदनमा मंगलबार आदेश पनि आयो।

अदालतले फागुन २ मा पहिलो सुनुवाइ गर्दै अन्तरिम आदेश जारी हुने/नहुने भन्नेबारे निर्णय गर्न फिल्मको स्क्रिप्ट र श्रव्यदृश्य मागेको थियो। अदालतले चलचित्रको स्कीकृत स्क्रिप्टको प्रमाणित प्रतिलिपि र चलचित्रको श्रव्यदृश्य मगायो। मंगलबार छलफलमा बोलाएकोमा अवलोकनपछि न्यायाधीश लालबहादुर कुँवर र हेमन्त रावलको इजलासले अन्तरिम आदेश जारी गर्यो।

अन्तरिम आदेश दिनुको कारणमा निवेदक आलमको मुखाकृति र आवरणसँग हुबहु मिल्ने गरी पात्रले अभिनय गरेकोलाई लियो र उनको आवरण मिल्ने सामग्री सामाजिक सञ्जाल तथा अन्य सार्वजनिक सञ्चार माध्यमहरूमा प्रचारप्रसार नगर्न, सो सम्बन्धी पोस्टहरू प्रकाशन, प्रसारण नगर्न अन्तरिम आदेश जारी गरी गर्यो।

अब केन्द्रीय चलचित्र जाँच समिति (सेन्सर बोर्ड)ले अनुमति नदिँदासम्म चलचित्रको प्रचारप्रसार गर्न र प्रचार सामग्री सार्वजनिक गर्न पाइँदैन। निवेदनमा आलमले फिल्मले आफ्नो आकृति हुबहु प्रयोग गर्नु अवैध रहेको र यसले मान्यता पाएमा अवैधानिक तथा प्राकृतिक न्यायको सिद्धान्त विपरीतको काम कार्यले वैधानिकता पाउने, कानुनको शासनको उपहास हुने र व्यक्तित्वको अधिकारमा आघात पर्न गई आफ्नो व्यक्तित्वमाथि जनमानसमा घृणा र घृणाजन्य अभिव्यक्ति (हेट स्पिच) पैदा हुने तर्क गरेका थिए।

फागुन ६, २०८१ मंगलबार २३:००:३७ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।