संस्कृत विश्वविद्यालयको १६ सय जग्गामध्ये नौ सय १० बिघा अतिक्रमित

काठमाडौँ : नेपाल संस्कृत विश्वविद्यालयको देउखुरी क्षेत्रमा रहेको एक हजार तीन सय ३६ बिघामध्ये नौ सय १० बिघा अतिक्रमित भएको खुलेको छ। जग्गा खोजबिन समितिको छानबिनमा दाङमा रहेको विश्वविद्यालयको एक हजार छ सय ६२ बिघा जग्गामध्ये देउखुरी क्षेत्रमा एक हजार तीन सय ३६ बिघा रहेको र त्योमध्ये नौ सय १० बिघा अतिक्रमण भई २०५९ देखि जग्गाबाट विश्वविद्यालयले कुनै आम्दानी नपाएको उल्लेख गरेको छ।

समितिले मंगलबार प्रधानमन्त्री केपी शर्मा ओलीलाई बुझाएको प्रतिवेदनमा विश्वविद्यालयको दुई सय बिघा जमिन राप्ती नदीले कटान गरेको उल्लेख छ। प्रधानमन्त्री निवास बालुवाटारमा समितिका संयोजक शेखरप्रसाद पौडेलले मंगलबार विश्वविद्यालयको जग्गाहरूको उपयोग, अतिक्रमणको अवस्था र अतिक्रमण हटाउन चालिनुपर्ने कदमका विषयमा सुझावसहितको प्रतिवेदन बुझाएको थियो। प्रधानमन्त्री विश्वविद्यालयको कुलपति हुन्।

मन्त्रिपरिषद्ले असार २० गते उच्च अदालतका पूर्व न्यायाधीश पौडेलको संयोजकत्वमा पाँच सदस्यीय जग्गा खोजबिन समिति गठन गरेको थियो। समितिले जग्गालाई उपयोगमा ल्याउन भाडामा दिन सकिने र अतिक्रमण हटाउन सरकार र राजनीतिक दलको सहयोग आवश्यक हुने सुझाव दिएको छ।

प्रधानमन्त्री ओलीले प्रतिवेदन लिँदै अध्ययन र छलफल गरेर आवश्यक प्रक्रिया अघि बढाउने बताएका थिए। उनले विश्वविद्यालयहरूमा तालाबन्दी र अतिक्रमणजस्ता अवाञ्छित क्रियाकलाप रोकिनुपर्ने समेत बताएका थिए।

फागुन ६, २०८१ मंगलबार १९:४०:१५ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।