गायक कुमा सागरलाई जिस्काउँदा फसे पडकास्टर र कमेडियन, प्रहरीमा पर्यो उजुरी
काठमाडौँ : सुशान्त प्रधानको पडकास्टमा गायक कुमा सागरको गायन लवजलाई उडाउँदा विवाद बढेको छ। कमेडियन सजन श्रेष्ठ, उत्सव सापकोटा अनि गायक सुजन जिम्बाले प्रधानको पडकास्टमा गायक कुमाको मातृ भाषाको टोनलाई जिस्काएका थिए।
‘परबाट आउँदा’ बोलको गीत गाउँदै कमेडियन सजनले कुमाको मातृ भाषाको शैली भन्दै नेवा भाषाको टोनमा गीत गाउँदै उडाएका थिए। अन्य तीन जनाले पनि सजनलाई साथ दिएका थिए
पडकास्ट विवादित भएपछि सुशान्त प्रधानले सो भिडियो प्राइभेट गरिसकेका छन्। उता नेवा समुदायका सदस्यहरू सोमबार उनीहरूले नेवार समुदायको भातृ भाषाको टोनको खिल्ली उडाएर अपमान गरेको भन्दै कार्वाहीको माग गर्दै जिल्ला प्रहरी परिसर काठमाडौँ पुगेर उजुरी दिए।
उनीहरूले जाहेरी नै दर्ता गर्न खोजेका थिए। तर प्रहरीले उजुरी मात्र लियो। उजुरीमा सुशानसहित चारै जनामाथि कार्वाहीको माग गरिएको छ। उनीहरूले उजुरीमा भिडियो हटाउन समेत माग गरिसकेका छन्। तर भिडियो आइतबारै प्राइभेट भइसकेको छ।
रोस्टरहुँदै कमेडियन भएका सजनले आफू कुमाको फ्यान भएको र उनलाई अपमान गर्न त्यसरी नगाएको भन्दै माफी मागिसकेका छन्। उनले माफी मागे पनि यो विषय सम्हालिनुको साटो थप विवादित बन्दै गएर प्रहरीमा उजुरीको चरणसम्म पुगिसकेको छ।
भ्वाइस अफ नेपालमा सहभागी भएका कुमाका पछिल्ला गीतहरु निकै लोकप्रिय छ।
फागुन ५, २०८१ सोमबार २२:३८:४० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
