हुस्सु आयोजकको लापरबाहीले घाइते भए मन्त्री र मेयर

पोखरा : पोखरा भ्रमण वर्षको उद्घाटन कार्यक्रममा भएको लापरबाहीले अर्थमन्त्री विष्णु पौडेल र पोखरा मेयर धनराज आचार्य घाइते भए। हाइड्रोजन ग्याँस भरिएको बेलुनको झुप्पा उडाउन झिलझिले बत्ती नजिक लगेपछि बेलुनको झुप्पोमै आगो लाग्दा मन्त्री र मेयर दुवैको अनुहारमा चोट लाग्यो।

उद्घाटन भव्य बनाउन झिर्झिरे शैलीको बत्ती बालिएको थियो। उद्घाटन गर्न मन्त्री पौडेल र मेयर आचार्य मञ्चबाट तल झरे। आयोजकले उडाउन एउटा बेलुनको झुप्पो मन्त्री पौडेललाई दिए। बेलुन हाइड्रोजन ग्याँसले भरिएको थियो। अनि अर्कोले मेयर आचार्यलाई अर्को झुप्पा दिए।

मेयर आचार्यले बोकेको बेलुनको झुप्पामा आगोले छोए लगत्तै ह्रारै आगो लाग्यो। मन्त्री पौडेल भागेर मञ्चमा पुगेर कोट फुकालेर आगो टकटकाउन लागे। मेयर आचार्य तलै थिए।

बेलुनमा रहेको ग्याँस बल्दा दुवैको अनुहार पोल्यो। मन्त्री पौडेलको आँखी भौँ साइडमा पोल्यो भने मेयर आचार्यको गर्दन साइडमा पोल्यो। मन्त्रीको तुलनामा मेयरको बढी पोलेको थियो। दुवै उपचारका लागि काठमाडौँ लगियो। दुवैको कीर्तिपुरमा रहेको बर्न अस्पतालमा उपचार हुनेछ।

फागुन ३, २०८१ शनिबार १५:४१:४९ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।