शनिबार रिहा हुने इजरायली बन्धकहरूको नाम सार्वजनिक भएपछि ट्रम्पले के भने?

एजेन्सी : हमासले प्यालेस्टिनी कैदीहरूको बदलामा शनिबार रिहा गरिने तीन इजरायली बन्धकहरूको नाम सार्वजनिक गरेसँगै अमेरिकी राष्ट्रपति डोनाल्ड ट्रम्पले प्रतिक्रिया दिएका छन्।

ट्रम्पले शनिबार १२ बजेसम्म के हुनेछ भन्ने विषय सोचेर आफूले कडा अडान लिने भन्दै इजरायलसँग थप छलफल हुनेबारेमा समेत स्पष्ट पारे।

‘म फरक दृष्टिकोण अपनाउनेछु। यद्यपि, यो बीबी (बेन्जामिन नेतान्याहू)ले के गर्ने भन्नेमा निर्भर गर्दछ,’ उनले भने, ‘मलाई लाग्छ उनीहरू पूर्ण रूपमा परिवर्तन भएका छन्, हमास पूर्ण रूपमा परिवर्तन भएको छ।’

हमासले बन्धक रिहा गर्ने भनेपछि ट्रम्पले यस्तो अभिव्यक्ति दिएका हुन्। यसअघि हमासले इजरायलमाथि युद्धविरामका सर्तहरू उल्लङ्घन गरेको आरोप लगाएर बन्धकहरूको रिहाइमा रोक लगाएको थियो।

हमासको यो बयानपछि अमेरिकी राष्ट्रपति डोनाल्ड ट्रम्प र इजरायलले कडा चेतावनी दिएका थिए। ट्रम्पले भनेका थिए कि यदि हमासले शनिबारसम्म गाजामा राखिएका सबै बन्धकहरूलाई रिहा गरेन भने युद्धविराम अन्त्य गर्नुपर्ने बताएका थिए।

यसैबीच, इजरायली प्रधानमन्त्री बेन्जामिन नेतान्याहूले गाजामा अर्को युद्धको चेतावनी दिएका छन्।

फागुन ३, २०८१ शनिबार १०:३२:२६ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।