अष्ट्रेलियाविरुद्धको ओडिआई सिरिज श्रीलंकाद्वारा क्लिन स्वीप

काठमाडौं : अष्ट्रेलियाविरुद्धको दुई खेलको एकदिवसीय सिरिज घरेलु टोली श्रीलंकाले क्लिन स्वीप गरेको छ।

कोलम्बोको आर प्रेमादासा क्रिकेट स्टेडियममा भएको दोस्रो खेलमा श्रीलंकाले अष्ट्रेलियामाथि १७४ रनको फराकिलो जित हात पार्यो।

उसको जितमा दुनिथ वेल्लालागेले चार तथा असिथा फर्नान्डो र वानिन्दु हसरंगाले समान तीन–तीन विकेट लिए।

२८२ रनको लक्ष्य पछ्याउने क्रममा अष्ट्रेलिया २४.२ ओभरमा १०७ रनमा समेटियो। उसका लागि कप्तान स्टिभ स्मिथले सर्वाधिक २९ रन बनाए।

जोस इंग्लिसले २२ र ट्राभिस हेडले १८ रन बनाउँदा अन्य खेलाडीले दोहोरो अंकमा रन जोड्न सकेनन्।

उता टस जितेर पहिला ब्याटिङमा उत्रिएको श्रीलंकाल निर्धारित ५० ओभरमा चार विकेट गुमाएर २८१ रन बनायो।

श्रीलंकाको सुरुवात खास नभए पनि पछिल्लो १० ओभरमा भने निक्कै राम्रो क्रिकेट खेल्यो। पहिलो ४० ओभरमा १८४ रन जोडेको टोलीले अन्तिम १० ओभरमा ९७ रन जोड्यो।

उसका लागि कुसल मेन्डिसले सर्वाधिक शतकीय पारी खेले। ११५ बलको सामना गरेका उनले ११ चौकाको मद्दतमा १०१ रन जोडे।

कप्तान चरिथ असलंकाले ६६ बलमा छ चौका र तीन छक्काको मद्दतमा अविजित ७८ रनको अर्धशतकीय पारी खेल्दा निशान मदुस्काले पनि ५१ रन बनाए।

त्यसका अलावा जनिथ लियाङ्गेले अविजित ३२ रन जोड्दा अन्य दुई खेलाडीले दोहोरो अंकमा रन जोड्न सकेनन्।

अष्ट्रेलियाका एडम जाम्पा, सिन एबोट्, एरोन हार्डी र बेड ड्वारस्विसले समान एक-एक विकेट लिए।

यसअघि भएको पहिलो ओडिआईमा श्रीलंकाले अष्ट्रेलियालाई ४९ रनले पराजित गरेको थियो।

फागुन ३, २०८१ शनिबार ०७:३९:२९ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।