फिल्म चलाउन फिल्मी नै लेनदेन : घाटा घटाउन १५ लाखमा मुद्दा फिर्ता, फिल्म फ्लप भएपछि चेक बदरको माग

काठमाडौं : अदालतको आदेशमा फिल्मको रिलिजै रोकिएपछि एक्टर : टेक वानका निर्माताले अर्को फिल्म ‘एक्टर’को निर्मातालाई १५ लाख दिने सर्तमा मुद्दा फिर्ता गराएको खुलेको छ।

फिल्म ‘एक्टर’का निर्माता आफ्नो फिल्मको नामसँग जुधाएको भन्दै अदालत गएपछि उच्चको आदेशमा ‘एक्टर : टेक वान’को रिलिज रोकिएको थियो। पछि दुवै पक्षबीच सहमति भएर रिलिज खुल्यो। तर त्यो सहमति १५ लाखको प्रलोभनमा भएको पछि खुल्यो।

पहिला ‘एक्टर : टेक वान’ को निर्माताले पैसा दिन्छु भनेर अदालतमा विचाराधीन मुद्दा फिर्ता लिन लगाएको तर मुद्दा फिर्तापछि फिल्म रिलिज भए पनि व्यापारै नभएपछि सर्त अनुसारको पैसा नतिर्न बिहीबार आफैँले मुद्दा हालेको देखिन्छ।

माघ १६ मा ‘एक्टर : टेक वान’ रिलिज हुँदै थियो। तर ‘एक्टर’को निर्माण पक्षले उच्च अदालतमा फिल्म रिलिज रोक्न माग गर्दै हालेको रिटमा तत्कालका लागि फिल्म रिलिज रोक्न आदेशदिँदै अदालतले दुवै पक्षलाई छलफलमा बोलाएको थियो।

अदालतले छलफलमा बोलाएको मितिसम्म नकुरी ‘एक्टर : टेक वान’ र ‘एक्टर’ फिल्मको निर्माताबीच अदालतमा विचाराधीन रहेको मुद्दा फिर्ता लिने र फिल्म रिलिज हुन दिने सहमति भएको थियो। सहमतिको समयमा दुवै फिल्मका निर्माणपक्षले सहमति भएको सर्त भने लुकाएका थिए।

सार्वजनिक भएको सहमति पत्रमा ‘एक्टर : टेक वान’लाई थप आर्थिक क्षति हुनबाट जोगाउन फिल्म रिलिज हुन दिने र अदालतमा दायर गरेको प्रतिलिपि अधिकार सम्बन्धी मुद्दा फिर्ता लिने सहमति भएको मात्र उल्लेख थियो।

तर दुबै पक्षबीच यो सहमतिमा पुग्न ‘एक्टर : टेक वान’ फिल्मको निर्माण टिमले फिल्म एक्टरको निर्माण टिमलाई १५ लाख रकम दिने सर्तमा सहमति भएको बिहीबार अर्को मुद्दा परेपछि सार्वजनिक भयो।

सहमतिपछि ‘एक्टर : टेक वान’ फिल्म रिलिज भए पनि आर्थिक रूपमा फिल्म फ्लप भएपछि यसका निर्माता शुक्रवार फिल्म रिलिज गर्न दिने भन्दै अनुचित प्रभावमा पारेर ‘एक्टर’का निर्माताले १५ लाख रुपैयाँको चेक लिएको दाबी सहित काठमाडौँ जिल्ला अदालत पुगे।

सो फिराद पत्रमा उल्लेख भए अनुसार ‘एक्टर : टेक वान’को रिलिज खुलाउन अदालतमा रहेको मुद्दा फिर्ता लिए बापत निर्माताले ‘एक्टर’ को निर्मातालाई एक महिनापछिको मिति राखेर चेक दिएको देखिन्छ। दुवै पक्षबीच माघ १७ मा सहमति भएको थियो।

बिहीबार अदालतमा ‘एक्टर : टेक वान’को निर्माताले दिएको निवेदनमा चेक बदर गराउन माग गरिएको छ। उनले ‘एक्टर’ फिल्मको निर्माता कम्पनी नेपाली डायस्पोरा इन्टरटेनमेन्ट प्रालिलाई विपक्षी बनाइएको छ।

फिराद पत्रमा ‘अदालतबाट चलचित्र प्रदर्शनमा रोक लगाउने आदेश विपरीत हामीसँग ‘एक्टर : टेक वान’ चलचित्र प्रदर्शन गर्न दिने भनी, प्रतिलिपि अधिकार हनन भयो भन्दै झुक्क्याइ, जालसाजी र अनुचित दबाबमा पारेर क्षतिपूर्ति बापत १५ लाख रुपैयाँको चेक लिएको’ दाबी गरेको छ।

एक्टर : टेक वन’का निर्माताले फिराद पत्रमा दुवै पक्षबीच भएको सम्झौता लिखत बदर गरी अनुचित समृद्धिको चेक बदर गर्न माग गरेका छन्।

फिल्मको नाममा लाजमर्दो खेल

पहिला नै  चलचित्र विकास बोर्डमा ‘एक्टर’ फिल्म दर्ता भएर छायाङ्कनमा गइसकेपछि चलचित्र विकास बोर्डमा पुन एक्टर : टेक वान नाममा अर्को फिल्म दर्ता भयो।

पहिलो फिल्मको नाम Actor  राखियो भने अर्को फिल्मले प्रारम्भमा Aktor नाम राखेर फिल्म निर्माण सुरु गरेको थियो। पछि फिल्मको नामको पछाडि Aktor : Take one राखियो।

एक्टर माघको दोस्रो साता रिलिज त भयो तर व्यापार शून्य। एक्टर : टेक वान माघ १६ मा रिलिज हुँदै थियो। फिल्म एक्टरको निर्माताले माघ १५ मा प्रतिलिपि अधिकार उल्लङ्घन गरेको दाबी गर्दै उच्च अदालत पाटनमा निवेदन दिए। पहिलो सुनुवाइमा अदालतले रिलिज रोक्न अन्तरकालिन आदेश दिँदै दुवै पक्षलाई माघ २२ मा छलफलमा बोलायो।

मुद्दा कायम रहेमा माघ २२ सम्म एक्टर : टेक वान रिलिज हुन नसक्ने भएपछि एक्टर : टेक वान टिमले सहमतिको प्रयास गर्यो। माघ १७ मा दुवै पक्षबिच छलफल भयो। र त्यही दिन तत्काल हलमा फिल्म रिलिज गर्ने दिने र अदालत खुले लगत्तै मुद्दा फिर्ता लिने सहमति भयो। सहमतिमा आर्थिक लेनदेन भएको पक्ष दुवैले लुकाए। सहमति अनुसार एक्टर टेक वान रिलिज भयो। एक्टरको टिमले अदालतबाट मुद्दा फिर्ता लिए।

फिल्म डुबेपछि पैसा नतिर्ने नियत

एक्टर : टेक वानले सहिद दिवस र ल्होसारको सार्वजनिक बिदा पारेर व्यापार हुने आसमा माघ १६ लाई रिलिज मिति तोकेको थियो। प्रचार पनि त्यही अनुसार अगाडि बढायो।

एक्टर फिल्मको निर्माण टिमले आफ्नो फिल्मको नामसँग जुधाएको भन्दै आपत्ति जनाइरहेको थियो। तर एक्टर टेक वान टिमले वास्तै गरेन। उनीहरूले कतै फिल्म चल्छ कि भन्ने आसमा फिल्म रिलिज पनि गरे। तर फिल्म चल्दै चलेन। अनि उनीहरू अदालत गए।

एक्टरको निर्माता अदालत जाँदा पनि फिल्म एक्टर : टेक वान टिमले वास्ता गरेन। उ अदालतमै गएन। प्रतिवादी पक्ष अदालतमा छलफलका लागि उपस्थित नभएपछि अदालतले प्रतिवादीले छलफलको मिति सम्बन्धी जानकारी पाएको नदेखिएको भन्दै चलचित्र विकास बोर्डको सहयोगमा सम्बन्धित कम्पनीलाई छलफलको पत्र दिनु भन्दै अदालतले छलफलको अवधि अर्थात् माघ २२ सम्म फिल्म रिलिज रोक्न अल्पकालीन आदेश दियो।

फिल्मको रिलिजै रोकिएपछि मात्रै फिल्म एक्टर : टेक वानको निर्माण टिम झस्कियो र छलफलमा सक्रिय भयो। छलफलमा दुवै पक्षबीच एक्टरको टिमलाई क्षतिपूर्ति बापत १५ लाख दिने र त्यस बापत एक्टर टिमले एक्टर टेक वानको निर्माता र चलचित्र विकास बोर्ड विरुद्ध दायर गरेको मुद्दा फिर्ता लिने सहमति भएको थियो।

सहमति अनुसार सबै काम भयो। तर एक्टर : टेक वान फिल्मले हलमा दर्शक तान्न सकेन। फिल्म फ्लप भयो। फिल्म फ्लप भएपछि आफूले दिएको चेक बराबरको रकम दिनुपर्ने यदि नदिए चेक बाउन्सको अर्को मुद्दा लाग्ने जोखिम देखेपछि एक्टर टेक वानको निर्माता अर्को मुद्दा लिएर अदालत गए।

सहमती पत्रमा नेपाली डायस्पोरा इन्टरटेनमेन्टका सम्राट थापा, अदृत फिल्म प्रालीका थमनकुमार भण्डारी र अ मोती फिल्म प्रालीका मोती कार्कीले हस्ताक्षर गरेका छन्। थमन र मोती 'एक्टर : टेक वान' का निर्माता हुन्। रोहवरमा एक्टर फिल्मका निर्माता मनोहरी थापा, मोहनजंग थापा अनि अधिवक्ता यज्ञमणी न्यौपाने समेत छन्। यसले सहमती पत्रको वैधतामा कुनै कानुनी प्रश्न देखिदैन।

तर सो सहमती पत्रमा सहमतीको सर्त १५ लाख दिने उल्लेख छैन। सो उल्लेख भएको भए कानुनी प्रश्न उठ्ने आधार देखिदैन। तर 'एक्टर : टेक वान' का निर्माता मुद्दामा गएकाले १५ लाखको चेक मौखिक सहमतीमा दिएको तर सहमती पत्रमा उल्लेख नगरेको सम्भावना देखाएको छ।

बिहीबार अदालतले दुवै पक्षलाई चैत ६ मा अदालतमा उपस्थित हुन आदेश दिएको छ। अदालतले चेक बदर गराउँछ वा मुद्दा फिर्ताका लागि मनाउन रकमको प्रलोभनमा पारेको भनेर उल्टो एक्टर टेक वानको निर्माता दण्डित हुन्छन्? यो मुद्दाको रोचक पक्ष यही हुने देखिन्छ।

फागुन २, २०८१ शुक्रबार २३:३५:२० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।