श्रीलंकाले अष्ट्रेलियालाई दियो २८२ रनको लक्ष्य, कुसलको शतक

काठमाडौं : अन्तिम पावर प्लेमा आक्रामक ब्याटिङ गरेसँगै अष्ट्रेलियाविरुद्धको दुई खेलको एक दिवसीय (ओडिआई) सिरिजको दोस्रो खेलमा श्रीलंकाले २८२ रनको लक्ष्य दिएको छ।

श्रीलंकाको आर प्रेमादासा क्रिकेट स्टेडियममा टस जितेर पहिला ब्याटिङ गरेको टोलीले निर्धारित ५० ओभरमा चार विकेट गुमाएर १८१ रन जोडेको हो।

श्रीलंकाको सुरुवात खास नभए पनि पछिल्लो १० ओभरमा भने निक्कै राम्रो क्रिकेट खेल्यो। पहिलो ४० ओभरमा १८४ रन जोडेको टोलीले अन्तिम १० ओभरमा ९७ रन जोड्यो।

उसका लागि कुसल मेन्डिसले सर्वाधिक शतकीय पारी खेले। ११५ बलको सामना गरेका उनले ११ चौकाको मद्दतमा १०१ रन जोडे।

कप्तान चरिथ असलंकाले ६६ बलमा छ चौका र तीन छक्काको मद्दतमा अविजित ७८ रनको अर्धशतकीय पारी खेल्दा निशान मदुस्काले पनि ५१ रन बनाए।

त्यसका अलावा जनिथ लियाङ्गेले अविजित ३२ रन जोड्दा अन्य दुई खेलाडीले दोहोरो अंकमा रन जोड्न सकेनन्।

अष्ट्रेलियाका एडम जाम्पा, सिन एबोट्, एरोन हार्डी र बेड ड्वारस्विसले समान एक–एक विकेट लिए।

पहिलो एकदिवसीय खेलमा श्रीलंकाले अष्ट्रेलियालाई ४९ रनले स्तब्ध बनाएको थियो।
 

फागुन २, २०८१ शुक्रबार १३:५८:२८ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।