‘इन्डियाज गट लेटेन्ट’मा आपत्तिजनक प्रश्न सोधेको मुद्दामा सर्वोच्च पुगे रणवीर इलाहबादिया

एजेन्सी : भारतीय कलाकार समय रैनाको कार्यक्रम ‘इन्डियाज गट लेटेन्ट’मा आपत्तिजनक प्रश्न सोधेकोमा मुद्दा दायर भएपछि पडकास्टर रणवीर इलाहाबादिया सर्वोच्च अदालत पुगेका छन्।

पडकास्टर इलाहाबादियाले आफूविरुद्ध दर्ता भएका सबै एफआईआरहरूविरुद्ध सर्वोच्च अदालतमा निवेदन दायर गरेका छन्। निवेदनमा आफूविरुद्ध दायर भएका सबै एफआईआरहरूको सुनुवाइ एकसाथ गर्न माग गरिएको छ।

पडकास्टरका तर्फबाट उपस्थित अधिवक्ता अभिनव चन्द्रचूडले प्रधानन्यायाधीश संजीव खन्नासँग मुद्दाको छिटो सुनुवाइको माग समेत गरे।

यस विषयमा प्रधानन्यायाधीशले समयमै सुनुवाइ हुने भन्दै त्यसका लागि तारेख दिइएको बताए। यस विषयमा रणवीर इलाहाबादिया विरुद्ध असम र महाराष्ट्रमा एफआईआर दर्ता भएको छ।

यो विषयमा विवाद बढ्दै गएपछि उनले माफी मागेका छन् भने समय रैनाले समेत कार्यक्रमका सबै एपिसोड युट्युबबाट हटाइएको छ।

रणवीरले सामाजिक सञ्जालमा लेखिएको माफीमा उनले भनेका छन्, ‘मेरो टिप्पणी न त सही थियो न त हास्यास्पद। कमेडी मेरो विशेषज्ञता होइन। म यसको लागि कुनै स्पष्टीकरण दिने छैन। म सबैसँग माफी माग्न चाहन्छु। जे भयो त्यो राम्रो भएन। म परिवारको अपमान गर्दिन। मैले निर्माताहरूलाई विवादास्पद टिप्पणी हटाउन भनेको छु।’

यसअघि उनले मुम्बई पुलिससमक्ष आफ्नो घरमा बयान लिन आग्रह गरेका थिए। तर, मुम्बई पुलिसले घरमा बयान लिन अस्वीकार गरेको थियो।

फागुन २, २०८१ शुक्रबार १३:०२:३५ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।