मोदीसँगको भेटअघि ट्रम्पले भारतसहितका देशमाथि लगाए ‘टिट फर ट्याट’ ट्यारिफ

एजेन्सी : अमेरिकी राष्ट्रपति डोनाल्ड ट्रम्पले भारतीय प्रधानमन्त्री नरेन्द्र मोदीसँग भेट्नुभन्दा दुई घण्टा अघि भारतसहित सबै देशहरूमा पारस्परिक कर लगाउने घोषणा गरेका छन्।

कुनै देशले अमेरिकी सामानमा जति कर लगाउँछ, अमेरिकाले त्यो देशको सामानमा पनि उति नै कर लगाउनुलाई पारस्पारिक कर भनिन्छ।

ट्रम्पले बिहीबार राति यससँग सम्बन्धित नयाँ ट्यारिफ नीतिमा हस्ताक्षर गरेको समाचार एजेन्सी रोयटर्सले जनाएको छ।

हस्ताक्षरपछि पत्रकारहरूसँग कुरा गर्दै ट्रम्पले भारतले धेरै उच्च शुल्क लगाएको आरोप लगाए।

उनले भने, ‘मलाई याद छ- भारतले उच्च कर लगाएका कारण हार्ले डेभिडसनले भारतमा आफ्ना मोटरसाइकलहरू बेच्न सकेन। जसकारण हार्लेले उत्पादन बन्द गर्न बाध्य भएको थियो।’

भन्सार शुल्कबाट बच्न हार्ले डेभिडसनले भारतमा कारखाना स्थापना गर्नुपरेको घटना स्मरण गर्दै ट्रम्पले आफूहरूले पनि त्यस्तै गर्ने बताए।

उनले अगाडि थपे, ‘भारतीय कम्पनीले भन्सार शुल्कबाट बच्न यहाँ कारखाना वा प्लान्ट स्थापना गर्न सक्छन्।’

किन पारस्परिक कर लगाउँदैछन् ट्रम्प?
ट्रम्पले केही दिनअघि मिडियालाई अब पारस्परिक (tit for tat)को समय आएको बताएका थिए।

उनले पत्रकारहरूलाई भनेका थिए, ‘अब तपाईंले पारस्परिक शब्द निरन्तर सुन्नुहुनेछ। यदि अन्य देशहरूले थप भन्सार शुल्क लगाए भने, हामी पनि उनीहरूमाथि थप भन्सार शुल्क लगाउनेछौँ।’

अन्य देशहरूले अमेरिकाभन्दा धेरै उच्च कर लगाएर अमेरिकालाई धोका दिइरहेको ट्रम्पले बताए।  अन्य देशहरू जस्तै आयात कर लगाउनाले निष्पक्ष व्यापार सुनिश्चित हुने र अमेरिकी सरकारको राजस्व बढ्ने उनको भनाइ छ।

यसबारे ह्वाइट हाउसले अन्य देशहरूले अमेरिकालाई लुटिरहेका बताएको थियो। अमेरिकी कामदारहरूलाई फाइदा र राष्ट्रिय सुरक्षामा सुधारका लागि पारस्पारिक कर अमेरिकाका लागि उत्कृष्ट नीति हुने ट्रम्पको विश्वास छ।

भारतमा कस्तो प्रभाव
यदि अमेरिकाले भारतमाथि कर बढायो भने यसले भारतका लागि घाटा निम्तिनेछ। भारतले अमेरिकासँग १७ प्रतिशतभन्दा बढी वैदेशिक व्यापार गर्छ। भारतका कृषि उत्पादनहरू अमेरिकामा बिक्री हुँदै आएका छन्।

अमेरिकाले २०२४ मा भारतबाट १ करोड ८० लाख टन चामल आयात गरेको थियो। यदि अमेरिकाले भारतीय सामानमाथि कर लगाउँदा तिनको मूल्य बढ्न गई खपत कम हुनेछ। जसले भारतीय उत्पादनको माग घट्नेछ।

अमेरिकी उत्पादनहरूमा सबैभन्दा बढी कर लगाउने देशमा भारत पनि
भारत अमेरिकी उत्पादनहरूमा सबैभन्दा बढी भन्सार लगाउने देशहरूमा पर्छ। इन्डियन एक्सप्रेसको रिपोर्ट अनुसार, १९९०-९१ सम्म भारतमा औसत शुल्क १२५ प्रतिशतसम्म थियो। उदारीकरण पछि, यो घट्न थाल्यो। २०२४ मा भारतको औसत भन्सार दर ११.६६ प्रतिशत थियो।

ट्रम्प पुन: राष्ट्रपति बनेपछि भारत सरकारले ट्यारिफ दरहरू परिवर्तन गरेको थियो। द हिन्दुको रिपोर्ट अनुसार, भारत सरकारले १५० प्रतिशत, १२५ प्रतिशत र १०० प्रतिशतको ट्यारिफ दरहरू खारेज गरेको छ।

अहिले भारतमा उच्चतम भन्सार दर ७० प्रतिशत छ। भारतमा विलासी कारहरूमा १२५ प्रतिशत भन्सार शुल्क थियो, अब यसलाई ७० प्रतिशतमा झारिएको छ। यस्तो अवस्थामा, २०२५ मा भारतको औसत भन्सार दर १०.६५ प्रतिशतमा घटेको छ।

सामान्यतया सबै देशहरूले भन्सार लगाउँछन्। यसको दर केही देशहरूमा कम र अरूमा बढी हुन सक्छ। यद्यपि, अन्य देशहरूको तुलनामा, भारत सबैभन्दा बढी भन्सार लगाउने देशहरू मध्ये एक हो।

फागुन २, २०८१ शुक्रबार १०:५५:२८ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।