अफ्रिदीसहित तीन पाकिस्तानी खेलाडीलाई आईसीसीको डन्डा

काठमाडौं : तीव्र गतिका बलर शाहीन शाह अफ्रिदीसहित पाकिस्तानका तीन खेलाडीलाई अन्तर्राष्ट्रिय क्रिकेट परिषद्(आईसीसी)ले कारबाहीको डन्डा चलाएको छ।

घरेलु मैदानमा जारी त्रिकोणात्मक ओडिआई सिरिजको दक्षिण अफ्रिकाविरुद्धको खेलमा आचारसंहिता उल्लंघन गरेको भन्दै अफ्रिदीसहित साउद शकील र कामरान गुलामलाई आईसीसीले कारबाही गरेको हो।

उनीहरूलाई आईसीसीको आचारसंहिताको लेभल १ उल्लंघन गरेको आरोपमा जरिवाना र डिमेरिट प्वाइन्ट दिइएको छ। अफ्रिदीलाई आचार संहिताको धारा २.१२ को उल्लङ्घन गरेको आरोपमा म्याच फीको २५ प्रतिशत जरिवाना गरिएको छ।

खेलको २८औं ओभरमा दक्षिण अफ्रिकी ब्याटर म्याथ्यु ब्रेट्ज्केलाई अफ्रिदीले रन लिने क्रममा रोक्ने प्रयास गरेका थिए।

त्यसैगरी सब्स्टिच्युट फिल्डर शकील र गुलामलाई २९औं ओभरमा रनआउट भएका ब्याटर तेम्बा बभुमासँग धेरै नजिक रहेर आक्रामक सेलिब्रेसन गरेको भन्दै म्याच फीको १० प्रतिशत जरिवाना गरिएको हो।

यो संहिताको धारा २.५ को उल्लङ्घन थियो। यी तीनमध्ये कसैको पनि पूर्व डिमेरिट पोइन्ट थिएन। दुई वर्षमा ४ डिमेरिट पोइन्ट पाएको खण्डमा एक टेस्ट वा दुई लिमिटेड ओभरको खेलबाट निलम्बन हुने नियम छ।

दक्षिण अफ्रिकाले दिएको ३ सय ५२ रनको लक्ष्य पछ्याएको पाकिस्तानले एकदिवसीय क्रिकेटमा ३ सय ५० रनभन्दा बढीको लक्ष्य पछ्याएको थियो। यो जितसँगै पाकिस्तान त्रिकोणात्मक सिरिजको फाइनलमा पुगेको थियो।

फाइनल आज कराँचीस्थित नेशनल स्टेडियममा नेपाली समयअनुसार दिउँसो पौने तीन बजेबाट सुरू हुनेछ।

फागुन २, २०८१ शुक्रबार ०९:२३:५४ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।