विद्यालय बस दुर्घटना : तीन जनाको मृत्यु, २७ डिस्चार्ज, १६ उपचारमै

काठमाडौँ : नगरकोटमा पिकनिक मनाएर फर्कनेक्रममा काठमाडौँको शङ्खरापुर नगरपालिका–५ कात्तिकस्थित सडकमा दुर्घटनामा परेको बा २ ख ७९५८ नम्बरको बसका घाइते ४३ मध्ये बिहीबार २७ जना उपचारपछि घर फर्किएका छन्।

नगरकोटमा ‘पिकनिक’ खाएर आउने क्रममा सत्यसाई एकेडेमीका विद्यार्थी चढेको बस बुधवार दुर्घटनामा परेको थियो।

सडकबाट २० फिट तल खसेर भएको दुर्घटनामा बुधवार बसमा सवार मोरङको उर्लाबारी नगरपालिका–७ घर भएका ११ वर्षीय क्रिस्चल पुरी, सिन्धुपाल्चोकको बलेफी गाउँपालिका–७ बस्ने २३ वर्षीय सुरेश तामाङ र काठमाडौँ बौद्ध बस्ने सिन्धुपाल्चोकको त्रिपुरासुन्दरी गाउँपालिका–३ घर भएका १४ वर्षीय शुसाङ्क डोटेलको मृत्यु भएको थियो। उनीहरू तीनै जना विद्यार्थी हुन्।

 जिल्ला प्रहरी परिसर काठमाडौँका प्रवक्ता प्रहरी उपरीक्षक अपिलराज बोहराका अनुसार दुर्घटनामा गम्भीर घाइते भएका क्रिस्चलको शिक्षण अस्पताल महाराजगन्जमा, सुरेशको नेपाल मेडिकल कलेजमा र शुसाङ्कको शङ्खरापुर अस्पतालमा उपचारका क्रममा मृत्यु भएको थियो।

अहिले घाइतेमध्ये दुईको केएमसी अस्पतालमा, नौको एनएमसी अस्पतालमा, एकको मोडिसिटी अस्पतालमा, दुईको शिक्षण अस्पताल महाराजगन्जमा, एकको हेल्पिङ हेण्ड अस्पताल चाबहिलमा र एक जनाको पिपुल्स लाइफ केयर अस्पतालमा उपचार भइरहेको छ।

बस चालक प्रहरी नियन्त्रणमा छन्।

फागुन १, २०८१ बिहीबार १५:२६:२५ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए ukeraanews@gmail.com मा पठाउनु होला।