फिल्म ‘कर्मा’मा देखिएको विपिनको अपत्यारिलो लुक्स

काठमाडौँ : विपिन कार्की अभिनयमा जोखिम उठाउने मुटु भएका अभिनेता हुन् भन्नेमा कुनै शङ्कै रहेन। उनले अहिलेसम्म अभिनय गरेका फिल्म अनि त्यसमा उनले निभाएको चरित्रले नै यसको पुष्टि गर्छ।

जोखिम उठाउँदैमा नतिजा सधैँ सकारात्मक नै हुन्छ भन्ने हुन्न। उनको हकमा पनि त्यस्तै भइरहेको छ। उनले उठाएको जोखिमको सङ्ख्यामा सफल भएको सङ्ख्या भने निकै कम छ। तर उनी विचलित देखिँदैनन्।

त्यसैको उदाहरण देखियो फिल्म ‘कर्मा’ अनि त्यसमा देखिएको उनको क्यारेक्टरको लुक्स। बिहीबार निर्माण टिमले सार्वजनिक गरेको फिल्मको फस्टलुक पोस्टरमा रहेको एकल पात्र को हुन् भनेर ठम्याउन एक पटक घोरिनै पर्छ। अनुहार विपिनको हो कि जस्तो देखिन्छ। तर विपिनै हुन् पात्र।

उनको कपाल, अनुहारमा देखिएको कटले निकै भिन्न देखिएका छन् फिल्ममा। निर्माण टिमले विपिनलाई अनुबन्ध गरेको खबर सार्वजनिक गरेको केही दिनमै उनी व्यायामशालामा कसरत गर्दै गरेको तस्बिर सार्वजनिक भएको थियो। यदि फस्टलुक पोस्टरमा राखिएको तस्बिरमा प्रविधिबाट चिट नगरी विपिनको वास्तविक स्वरुपै त्यही हो भने उनले व्यायामशालामा भव्य मिहिनेत गरेको प्रस्ट हुन्छ।

हातमा सटगन बोकेका विपिन अनि विपिनको हाउभाउले फिल्म एक्सन जनरामा बनेको देखिन्छ। त्यही एक्सन जनराको पात्र अनुसार शारीरिक अवस्था सुहाउँदो बनाउन उनले व्यायामशालामा पसिना मज्जैले बगाएको देखियो।

‘अगस्त्य’ को निर्देशन गरेका सौरभ चौधरीको नै ‘कर्मा’लाई निर्देशन गरिरहेका हुन्। अगस्त्यमा पनि चौधरीले एक्सनमा राम्रै मिहिनेत गरेका थिए। तर कथ्य शैलीमा सम्हालिन नसक्दा फिल्म त्यति प्रभावकारी हुन सकेको थिएन।

चैत २९ को रिलिज मिति तोकेको ‘कर्मा’ उनको दोस्रो निर्देशन भएकाले पहिलो निर्देशनमा गरेको गल्ती त नदोहोर्याउलान् नै। त्यसमा पनि पटकथामा चासो राख्ने विपिन समेत रहेकाले कतै पटकथामा गडबड भए सच्याउन सघाउलान् नि!

फागुन १, २०८१ बिहीबार १४:५९:५४ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।