‘ताण्डवम्’ ट्रेलरको प्रतिक्रियामै दङ्ग निर्देशक जुनिम

काठमाडौं : फिल्म तथा म्युजिक भिडियोमा कलरिष्टको काम गर्दै आएका जुनिम गहतराजले फिल्म ‘ताण्डवम्’मार्फत निर्देशनमा डेब्यु गरे। उनको डेब्यु निर्देशन रहेको यो फिल्म यही फागुन ९ बाट प्रदर्शनमा आउन लागेको छ। फिल्मको प्रचारप्रसारमा निर्माण पक्ष दौडादौडमा छ।

सोमबार अफिसियल ट्रेलर रिलिज गरेका निर्माण टिमले फिल्ममा पारिवारिक तथा एक्सन थ्रिलर जनरालाई फोकस गरेको देखिन्छ।

फिल्मको ट्रेलरमार्फत निर्देशक जुनिमले पछिल्लो समय निर्माण भइरहेका फिल्मभन्दा फरक र युनिक बनाउने खोजेको देखिन्छ। ट्रेलरमा ‘त्यो रात के भयो ?’ भन्ने संवादबाट सुरु गरिएको छ। अनि ‘भगवान् पनि म, अनि राक्षस ?’ संवादबाट निर्माण टिमले ट्रेलर अन्त्य गरेको छ।

दुई मिनेट ५ सेकेन्डको ट्रेलरमा दर्शकमाझ सस्पेन्स तथा थ्रिलर महसुस गराउन कोसिस गरिएको छ।

फिल्मको ट्रेलर रिलिजपछि निर्देशक जुनिक दङ्ग देखिन्छन्। उनी फिल्मको ट्रेलरले दर्शकमाझ तारिफ पाइरहेको भन्दै हलमा लागेपछि पनि दर्शकको मन जित्ने विश्वासमा देखिन्छन्। फिल्ममा पुष्कर गुरुङ, प्रेम सुब्बा, सरिना मगर, अनोज पाण्डे, कमल कार्की,गोपाल कटुवाल लगायतको अभिनय छ।

सिंहदेवी प्रोडक्सनले भिजुअल आर्ट्स स्टुडियोको सहकार्यमा निर्माण भएको फिल्मका निर्माता धनकुमारी गहतराज, सविना मगर र मनिष गौतम हुन् भने हरि घले लामाले फिल्मलाई खिचेका छन्।

फिल्ममा सम्राट् बस्नेतको एक्सन निर्देशन, सुशान्त गौतमको सङ्गीत र कोविद बज्रको ब्याकग्राउण्ड म्युजिक रहेको छ भने फिल्मको कथा, पटकथा तथा संवाद अनिरुद्ध आत्रेय र हुसेनले लेखेका हुन्।

माघ ३०, २०८१ बुधबार १६:११:३८ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।