अष्ट्रेलियाको सात शहरमा गुञ्जँदै नेपथ्य

काठमाडौं : नेपथ्यले अष्ट्रेलियाका सात शहरमा सांगीतिक यात्रा गर्ने भएको छ।

आगामी मार्च ३ तारिख संघीय राजधानी क्यानबेराबाट सुरू हुने नेपथ्य यात्रा २९ तारिख सिड्नीमा पुगेर सम्पन्न हुनेछ। त्यसबीच ब्याण्डले पर्थ, ब्रिसबेन, होबार्ट, एडिलेड र मेलबर्नको मञ्चमा आफूलाई उभ्याउने छ। नेपथ्यको यो सातौँ अष्ट्रेलिया यात्रा श्रृंखला हो।

‘नेपथ्यले स्थापनादेखि नै देश विदेशमा प्रस्तुति दिँदै आएको भए तापनि ब्याण्डलाई विशिष्ट कलेवरमा पहिलोपटक उभ्याउने काम अष्ट्रेलियाले गरेको थियो,’ मुख्य गायक एवं अगुवा अमृत गुरुङ सम्झन्छन्, ‘त्यहाँका श्रोता दर्शकबाट पाइने न्यानो मायाले हरेक यात्रामा अविष्मरणीय छाप छोड्दै आएको छ।’

अष्ट्रेलियाको यात्रामा यसपटक छ जना ब्यान्डका सदस्य र आठ जना प्राविधिक एवं व्यवस्थापन गरेर १४ सदस्यीय समूह प्रस्थान गर्नेछ।

यो वर्षको पहिलो नेपथ्य कन्सर्ट राजधानी क्यानबेराको ‘नेशनल कन्भेन्सन सेन्टरस्थित रोयल थिएटर’ मा आयोजना हुनेछ। त्यसको छ दिनपछि अर्थात् मार्च महिनाको ९ तारिख पर्थको ‘मेट्रो सिटी’मा नेपाली लोकरकको चीरपरिचित स्वर गुञ्जिनेछ। यो सहर वेस्टर्न अष्ट्रेलिया राज्यको राजधानी हो।

मुलुककै पश्चिमी किनारामा यसरी प्रस्तुत हुनासाथ ब्याण्ड फेरि पूर्वी किनाराको ब्रिस्बेन पुग्नेछ। क्विन्स्ल्याण्ड राज्यको यो राजधानीस्थित ‘दी टिभोली’ हलमा मार्चको १४ तारिख प्रस्तुति रहनेछ।

त्यसको लगत्तै टोली दक्षिणवर्ती टापु तास्मानियाको यात्रामा हिँड्नेछ। राजधानी होबार्टस्थित ‘ओडिअन थिएटर’ मा मार्च १८ तारिख नेपथ्यका गीतहरू सुनाइने छन्। यो हलमा यसअघि पनि ब्याण्डले कार्यक्रम गरिसकेको छ।

पाँचौं प्रस्तुति भने साउथ अष्ट्रेलिया राज्यको राजधानी एडिलेडमा आयोजना हुनेछ।  मार्च २१ तरिखका दिन त्यहाँस्थित ‘हिण्ड्ले स्ट्रीट म्यूजिक हल’ मा ब्याण्डले प्रस्तुति दिनेछ। त्यस लगत्तैको कन्सर्टका लागि ब्याण्ड भिक्टोरिया राज्यको राजधानी मेलबर्न पुग्नेछ। मार्च २४ तारिखका दिन त्यहाँस्थित ‘फेस्टिभल हल’ मा नेपथ्यले आफूलाई उभ्याउनेछ।

त्यसपछिको नेपथ्य यात्रा भने सिड्नीको हुनेछ। अष्ट्रेलियाकै पहिलो राज्य न्यूसाउथ वेल्सको राजधानी एवं आर्थिक केन्द्र सिड्नीमा नेपथ्य कन्सर्ट ‘होडर्न पभिलियन’मा आयोजना हुनेछ। थुप्रै विश्वविख्यात कलाकारहरूले आफूलाई प्रस्तुत गरिसकेको मुर पार्क स्थित यो हलमा नेपथ्य दोश्रोपटक उभिन लागेको हो।

यसरी सिड्नीमा व्यापक  दर्शकको घेरा अनुभव गरिसकेपछि ब्याण्ड स्वदेश फिर्तीको तयारीमा लाग्नेछ।

‘श्रोता दर्शकहरुको अपार माया पाउँदै आएको अष्ट्रेलियामा प्रस्तुतीका निम्ति सँधैजस्तै यसपाला पनि हामीले विशेष तवरबाट गीतहरु छनौट गरेका छौँ,’ मुख्य गायक एवं अगुवा अमृत थप्छन्, ‘त्यहाँका दर्शकहरूलाई पहिलेको भन्दा फरक सेटलिस्ट सहित गीत सुनाउने तयारी पनि चल्दैछ।’

मञ्चमा अमृतलाई ड्रमसेटमा ध्रुव लामा, बेस गितारमा सुबिन शाक्य, गितारमा निरज गुरुङ, मादलमा शान्ति रायमाझी र किबोर्डमा दिनेशराज रेग्मीले सघाउने छन्।

नेपथ्यको व्यवस्थापन सम्हाल्ने हिसाबले ब्याण्डसँग नेपालय आबद्ध भएको यो २५औं वर्ष पनि हो। यसबीच ब्याण्डले हालसम्म १७ वटा मुलुकको ४६ वटा सहरमा ८८ पटक आफूलाई उभ्याइसकेको छ।

‘नेपालीभाषीको उल्लेख्य उपस्थितिसँगै अष्ट्रेलियामा नेपाली कलाको बजार विकास भइसकेको छ,’ नेपालयका टिम लिडर किरणकृष्ण श्रेष्ठ भन्छन्, ‘त्यसलाई अझ विस्तारित एवं दिगो बनाउँदै लैजान हामीले नेपथ्यलाई सदैव जिम्मेवारीपूर्वक उपस्थित गराउँदै आएकोमा यसपाला पनि त्यसले निरन्तरता पाउनेछ।’

अष्ट्रेलियाका सबैजसो कन्सर्टमा दर्शकहरुले अनलाइनबाटै सोझै टिकट काट्न सकिने प्रवन्ध मिलाइएको छ। सबै शोको बुकिङसमेत खुला भइसकेको छ। कतिपय सहरमा भने विशेष छुट सहितका अग्रीम बुकिङ खुला गर्नेबित्तिकै त्यस्ता छुट्याइएका टिकट समाप्त भइसकेको जानकारी पनि आइरहेका छन्।

सबै सहरमा कार्यक्रमका जानकारी सहित अनलाइन बुकिङ लिंकको लागि दर्शकले नेपथ्यको आधिकारिक वेबसाइट www.nepathya.com.np मार्फत् जानकारी पाउन सक्नेछन्।

माघ ३०, २०८१ बुधबार १३:२५:२२ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।