त्रिदेशीय सिरिजमा पाकिस्तानले दक्षिण अफ्रिकाको सामना गर्दै

त्रिदेशीय सिरिजमा पाकिस्तानले दक्षिण अफ्रिकाको सामना गर्दै

काठमाडौं : च्याम्पियन्स ट्रफीको तयारीका लागि पाकिस्तानमा भइरहेको त्रिदेशीय एकदिवसीय सिरिजमा आज घरेलु टोलीले दक्षिण अफ्रिकाको सामना गर्दैछ।

खेल दिउँसो पौने ३ बजेबाट कराँचीस्थित नेशनल स्टेडियममा सुरु हुनेछ। न्यूजिल्यान्ड र दक्षिण अफ्रिका सम्मिलित त्रिदेशीय सिरिजमा पाकिस्तानको यो दोस्रो खेल हो।

यसअघि भएका पाँच एकदिवसीय खेलमा पाकिस्तानले चार खेल जिते पनि पछिल्लो समय पाकिस्तान लयमा देखिँदैन।

सिरिजको पहिलो खेलमा पाकिस्तान न्यूजिल्यान्डसँग ७६ रनले पराजित हुँदा दोस्रो खेलमा न्यूजिल्यान्डले दक्षिण अफ्रिकालाई छ विकेटले हराएको थियो।

दुवै खेल जितेको न्यूजिल्यान्डले शुक्रबार हुने फाइनल खेल्ने पक्का भइसकेको छ भने आजको टोलीको विजेताले न्यूजिल्यान्डसँगको भेट पक्का गर्नेछ। त्यसैले पनि आजको खेल दुवै टोलीका लागि गर वा मरको स्थिति हुनेछ।

च्याम्पियन्स ट्रफी १९ फेब्रुअरीबाट पाकिस्तान र युएईमा हुँदैछ। भारतीय टोली पाकिस्तान आउन नमालेपछि भारतका सम्पूर्ण खेल युएईमा हुनेछ।

माघ ३०, २०८१ बुधबार १२:२८:३० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।