गायिका एलिनाको सम्बन्धविच्छेद, पूर्व श्रीमानलाई लेखिन् ‘तिमीलाई बाँकी जीवनको धेरै शुभकामना’

काठमाडौँ : गायिका एलिना चौहानले दायर गरेको सम्बन्धविच्छेदको मुद्दा टुंगो लागेको छ। सोमबार उनले जिल्ला अदालत काठमाडौँमा दायर गरेको मुद्दा टुङ्गिएको हो। दुबैपक्षबीच सम्बन्धविच्छेदको सहमति भएपछि मुद्दा टुङ्गिएसँगै एलिनाले पूर्व श्रीमान् विष्णुको नाममा फेसबुकमा भावुक सन्देश समेत राखेकी छिन्।

उनले मुद्दा दायर गर्दा सम्पत्ति र माना चामलको हक माग गरेकी थिइनन्। सन्देशमा उनले पत्नीका रूपमा पाउने सम्पत्ति उनकै प्रगति र उन्नतिका लागि छाडेको उल्लेख गरेकी छिन्।

रहरले नभई बाध्यताले सम्बन्धविच्छेद गर्नु परेको भन्दै उनले लेखेकी छिन् ‘बाध्यता तिमी, मलाई र भगवानलाई मात्र थाहा छ। आजदेखि स्वतन्त्र भएर कानुनी रूपमै आ-आफ्नो गन्तव्य तय गर्न बाटो खुलेको छ।’

प्रेम सम्बन्धपछि दुबैबीच एक वर्ष अगाडि विवाह भएको थियो। उनको पूर्व श्रीमान अष्ट्रेलियामा बस्दै आएका छन्।

उनले पूर्व श्रीमानको नाममा फेसबुकमा राखेको सन्देश

प्रिय विष्णु,

अग्निलाई साक्षी राखेर ७ फेरा लगाउँदा गलेका खुट्टाहरू अझै उस्तै छन्। तिम्रो हातले रङिएको मेरो सिउँदो अनि सिन्दुरका डोबहरू अझै उस्तै छन्। तिम्रा नाममा लगाएका हातभरिका चुरा अनि छिनछिन आवाज अझै उस्तै छन्।

हामीलाई दुईबाट एक बनाएको सेतो लगनको गाँठो अझै उस्तै छ। वडा कार्यालयमा गएर बनाएको हाम्रो विवाह दर्ताको प्रमाणपत्र अझै उस्तै नयाँ छ। तर फेरा, चुरा, सिन्दुर, लगनगाँठो, विवाह दर्ता र शारीरिक मिलन मात्रै विवाह होइन रहेछ।

भावनात्मक मिलन, आपसी विश्वास र समझदारी नै विवाहको मुख्य प्राण रहेछ। जुन रहेन अनि हाम्रो सम्बन्धमा अल्पायु मै पूर्णविराम लागेको छ। यो रहरले होइन। जुन बाध्यता तिमी, मलाई र भगवानलाई मात्र थाहा छ। आजदेखि स्वतन्त्र भएर कानुनी रूपमै आ-आफ्नो गन्तव्य तय गर्न बाटो खुलेको छ।

पत्नीका रूपमा अधिकारले मैले पाउने सम्पत्ति तिम्रै प्रगति र उन्नतिका लागि छोडेको छु। तिमीलाई बाँकी जीवनको धेरै धेरै शुभकामना विष्णु।

माघ २९, २०८१ मंगलबार १७:१५:५६ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।