कालिज फार्ममा पसेको चितुवा काठमाडौं लगियो

रामेछाप : रामेछापको खाँडादेवी गाउँपालिका-३ भिरपानीको एक कालिज फार्ममा पसेको चितुवा नियन्त्रणमा लिएर काठमाडौं लगिएको छ।

सोमबार कालिज फार्ममा पसेको चितुवा नियन्त्रणमा लिएर काठमाडौं लगिएको खाँडादेवी गाउँपालिका अध्यक्ष ज्ञानकुमार श्रेष्ठले जानकारी दिए।

सोमबार वडा कार्यालय नजिकै रहेको कालिज फार्मको जाली तोडेर सो चितुवा फार्म भित्र छिरेको थियो। कालिज फार्ममा चितुवा छिरेपछि गाउँलेहरु त्रसित भएका थिए।

चितुवा फार्ममा छिर्ने बित्तिकै सञ्चालक नीरज खड्काले ढोका बन्द गरिदिएकाले चितुवा बन्धक बनेको थियो।

कालिज फार्म भित्र बन्धक बनेको चितुवालाई सोमबार काठमाडौंबाट गएको वन विभागको प्राविधिक सहितको टोलीले लट्याएर नियन्त्रणमा लिएको छ।

नियन्त्रणमा लिने क्रममा चितुवा सामान्य घाइते भएको छ। उसको आँखा र शरीरका केही भागमा सामान्य चोट लागेको अध्यक्ष श्रेष्ठले बताए।

चितुवालाई सोमबार साँझ काठमाडौं लगिएको छ।

माघ २९, २०८१ मंगलबार ०८:२९:१८ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।