केन विलियम्पसनको शतकमा न्यूजिल्यान्डले दक्षिण अफ्रिकालाई हरायो

काठमाडौं : च्याम्पियन्स ट्रफीको तयारी स्वरुप पाकिस्तानमा जारी त्रिदेशीय सिरिजको दोस्रो खेलमा न्यूजिल्यान्डले दक्षिण अफ्रिकालाई छ विकेटले पराजित गरेको छ।

लाहोरको गद्दाफी स्टेडियममा भएको खेलमा ३०५ रनको लक्ष्य पछ्याएको न्यूजिल्यान्डले ४८.४ ओभरमा चार विकेट गुमाउँदै लक्ष्य भेट्टायो।

उसका लागि केन विलियम्पसनले अविजित रहँदै शतकीय पारी खेले। ११३ बलको सामना गरेका उनाले १३ चौका र दुई छक्काको मद्दतमा १३३ रन जोडे।

डेभोन कोनवे शतक बनाउनबाट तीन रनले चुके। १०७ बलको सामना गरेका उनले नौ चौका र एक छक्काको मदद्तमा ९७ रन जोडे।

त्यस अलावा ग्लेन फिलिप्सले २८, विल योङले १९ र ड्यारी मिचेलले १० रन बनाउँदा टम ल्याथम पहिलो बलमै आउट भए।

दक्षिण अफ्रिकाका सेनुरन मुथुसामीले दुई तथा जुनियर डाला र इथन बोस्चले समान एक-एक विकेट लिए।

त्यसअघि टस हारेर पहिला ब्याटिङमा तानिएको दक्षिण अफ्रिकाले निर्धारित ५० ओभरमा ६ विकेट गुमाएर ३०४ रन जोड्यो।

उसका लागि म्याथू ब्रिटज्केले डेब्यु खेलमै शतकीय पारी खेले। १४८ बलको सामना गरेका उनले ११ चौका र पाँच छक्काको मद्दतमा १५० रन जोडे।

यस्तै, वियन मुल्डरले ६४ रनको अर्धशतकीय पारी खेल्दा जेसन स्मिथले ४१, कप्तान तेम्बा बमुवाले २० रन जोडे।

न्यूजिल्यान्डका क्याट हेन्री र विल ओरुरकेले समान दुई-दुई विकेट लिए।

जारी सिरिजमा न्यूजिल्यान्डको यो दोस्रो जित हो। यसअघि पाकिस्तानसँग भएको पहिलो खेलमा पनि यो टोली ७६ रनले विजयी भएको थियो।

सिरिजको अन्तिम खेलमा भोलि पाकिस्तान र दक्षिण अफ्रिका भिड्दैछन्। दुई खेल जितेर तालिकाको शीर्ष स्थानमा रहेको न्यूजिल्यान्डसँग भोलिको खेलको विजेताले उपाधिका लागि भिड्नेछ।

यो सिरिज लगत्तै तीनै टोलीले पाकिस्तानमा हुने च्याम्पियन्स ट्रफी खेल्नेछन्।

माघ २९, २०८१ मंगलबार ०७:४६:४१ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।