अर्जुन ट्रफीको उपाधि सीवाईसी अत्तरियालाई

काठमाडौं : अर्जुन ट्रफी राष्ट्रिय टी ट्वेन्टी च्याम्पियनसिपको उपाधि सीवाईसी अत्तरियाले जितेको छ। 

सोमबार भएको फाइनलमा अत्तरियाले फ्रेन्ड्स युथ क्लब डडेलधुरालाई ३४ रनले पराजित गरेको हो। अत्तरिया अपराजित रहँदै च्याम्पियन बन्यो।

धनगढीस्थित फाप्ला इन्टरनेशनल क्रिकेट ग्राउन्डमा टस जितेर ब्याटिङ गरेको अत्तरियाले २० ओभरमा ९ विकेट गुमाएर ११८ रनको सामान्य योगफल बनाएको थियो। ओपनर त्रितराज दासले खाता खोल्न सकेनन्। शंकर राना २०, कप्तान सन्तोष कार्की २० र भीम सार्की १० रनमा आउट भए। 

दीपेश कँडेल ७ रनमा रनआउट हुँदा विवेक यादवले ११ रन जोडेका थिए। राशीद खानले ३१ र सन्दीप जोराले १३ रन बनाएपछि अत्तरियाले एक सयको आँकडा पार गरेको थियो। 

अभिषेक गौतमले चार विकेट लिए। स्कोर बोर्डमा रन कम बनाए पनि अत्तरियाका बलरले उत्कृष्ट प्रदर्शन गरे। डडेलधुरा १८ ओभरमा ८४ रनमा अल आउट भयो। टिमको स्कोर ५ रन हुँदा दुई खेलाडी पभेलियन फर्किए। आयुष्मान् बम शून्यमा र विनोद भण्डारी ५ रनमा आउट भए।

गजेन्द्र बोहराले २४ र कुशल भुर्तेलले २० रन बनाउनु बाहेक अन्यको प्रदर्शन फितलो रह्यो। अशोक धामीको ११ रन बनाए पनि जितका लागि पर्याप्त भएन। दीपेश कँडेल र साहव आलमले तीन-तीन विकेट लिएपछि डडेलधुराको ब्याटिङ चल्न सकेन।

कमल गुप्ता र विवेकको नाममा दुई-दुई विकेट रह्यो। विवेक ‘प्लेयर अफ द सिरिज’ पनि बने। कुशल भुर्तेल उत्कृष्ट ब्याटर र बलर घोषित भए। उनले पाँच खेलमा १६८ रन र १३ विकेट लिएका थिए। उपाधि जितेको अत्तरियाले १० लाख र उपविजेता डडेलधुराले पाँच लाख पुरस्कार प्राप्त गरे।

माघ २९, २०८१ मंगलबार ०७:२६:३३ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।