फिल्म लाज शरणमको प्रचारका लागि बालेनको र्याप, पाँच घण्टामै ट्रेन्डिङको चौथो नम्बरमा
काठमाडौँ : र्याप गायनहुँदै काठमाडौँ महानगरपालिकाको मेयर बनेका बालेन शाहले नयाँ र्याप गीत नगाएको लामै समय भइसकेको थियो। एक वर्ष अगाडि उनले 'मन उड्यो' बोलको गीतको लन्डन भर्सन रिलिज गरेका थिए। निर्वाचनको समयमा उनले बलिदानको ‘गाई त बाँध्यो ढुङ्ग्रोमा मोही छैन’ बोलको र्याप गाएका थिए, इट्स माई शोका लागि।
त्यो अगाडि स्वतन्त्र क्रियशन हेर्ने हो भने उनले तीन वर्ष अगाडि 'लोकल ठिटो' बोलको गीत निकालेका थिए। 'लोकल ठिटो'लाई आधार मान्ने हो भने तीन वर्षको फरकमा उनको स्वरमा सोमबार उनको लेखन र सङ्गीतमा नयाँ र्याप गीत रिलिज भयो म नेपाल हाँसेको हेर्न चाहन्छु।
गीत उनको अफिसियल युट्युब च्यानलबाट रिलिज भए पनि यो उनको स्वतन्त्र क्रियशन भन्दा पनि फिल्म 'लाज शरणम्'को प्रमोसनका लागि निर्माण गरिएको हो। गीतको टाइटलमै 'लाज शरणम्' ओएसटी लेखिएको छ।
गीतको म्युजिक भिडियोमा बालेन भन्दा पनि फिल्मका कलाकार अर्जुन घिमिरे, सागर लम्साल लगायतका कलाकारहरू छन्। फिल्मले आफ्नो सबै प्रचारका सामग्री ओएसआर डिजिटलबाट प्रसारण गर्ने गरेको थियो। बालेनको र्याप भने उनकै युट्युब च्यानलबाट रिलिज गरियो।
त्यसको प्रभाव त पर्ने नै भयो। गीत रिलिज भएको पाँच घण्टामा यो नेपालतर्फको म्युजिक क्याटगरीमा चौथो नम्बरमा छ। यस अगाडि सार्वजनिक भएका फिल्मका प्रचार सामग्रीहरूले यो वैदेशिक रोजगारीको प्रभाव र फैलिएको दलालीमा केन्द्रित देखिएको थियो।
बालेनको गीतले वैदेशिक रोजगारीको कथा बोकेको छ। पाँच घण्टाको अवधिमा गीत साढे तीन लाख पटक हेरिसकिएको छ। यसले फिल्मको प्रमोसनलाई राम्रै सघाउने नै भयो।
यस अगाडि फिल्मले सिताराम कट्टेलको मोहम्मद आफताव आलमको गेटअप सार्वजनिक गरेको थियो। त्यसले पनि निकै चर्चा पाएको थियो। फिल्म शिवरात्रिमा रिलिज हुँदैछ।
माघ २८, २०८१ सोमबार २२:३४:०६ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
