साउथवेस्टर्नमा १३ औं विज्ञान प्रदर्शनी

काठमाडौँ : बसुन्धारास्थित साउथवेस्टर्न स्टेट कलेजले विज्ञान प्रदर्शनी आयोजना गर्यो। ‘विज्ञान प्रदर्शनी तथा क्यारिअर इन म्यानेज्मेन्ट २०२५’ नाम दिइएको कार्यक्रम दुई दिनसम्म सञ्चालन भएको थियो।

विद्यार्थीलाई वैज्ञानिक, व्यवहारिक, जीवनोपयोगी, अनुसन्धानात्मक शिक्षा दिन प्रदर्शनीको आयोजना गरिएको कलेजले जानकारी दियो। कलेजले आयोजना गर्दै आएको विज्ञान प्रदर्शनीको यो १३ औं संस्करण हो। प्रदर्शनीको उद्घाटन उप प्रधानमन्त्री तथा शहरी विकास मन्त्री सिंहले गरेका थिए।

कार्यक्रममा कलेजका अध्यक्ष इन्जिनियर वासुदेव विष्टले विज्ञान र प्रविधिको विकास विना कुनै पनि आविष्कार गर्न नसकिने बताउँदै साउथवेस्टर्न कलेजले स्थापना कालदेखि नै विज्ञान र प्रविधिलाई जोड दिँदै आएको जानकारी दिएका थिए।

कलेजका अन्तर्राष्ट्रिय कार्यक्रम संयोजक सरिता शाक्य प्रधानका अनुसार प्रदर्शनीसँगै निःशुल्क दन्त तथा अन्य स्वास्थ्य परीक्षण, रक्तदान, सोलार अवलोकन, साङ्गीतिक कार्यक्रम राखिएको थियो।

प्रदर्शनीमा निजी तथा सामुदायिक विद्यालय तथा कलेजका विद्यार्थीको तर्फबाट ६० वटा भन्दा बढी स्टलहरू राखिएको थियो। प्रदर्शनीमा सहभागी विद्यार्थीहरूलाई विभिन्न चरणको प्रतियोगितामा सहभागी गराएर नगद, शिल्ड तथा प्रमाणपत्र समेत प्रदान गरिएको थियो।

माघ २८, २०८१ सोमबार १३:४०:४१ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।