सबै फिल्मकर्मीलाई सपोर्ट गर्थे शोभित, आफ्नै छोराको फिल्म ‘रंगी’मा कसैले वास्ता नगर्दा चित्त दुखाए

काठमाडौं : तीन दर्जन भन्दा बढि नेपाली फिल्म बनाइसकेका निर्देशक शोभित बस्नेतले हरेक फिल्मीकर्मीको फिल्मलाई सपोर्ट गर्दै आएका छन्। उनी चाहे सानो बजेटको होस् चाहे ठूलो, जुनसुकै फिल्मको गीत, ट्रेलर, पोस्टर फेसबुकमा राख्दै तारिफ गरिरहेका छन्।

तर, उनैको छोरा तथा अभिनेता सलोन बस्नेतले निर्माण गरेको फिल्म ‘रंगी’लाई कसैले पनि सेयर गरेर सपोर्ट नगरेको भन्दै शोभित रिसाए। 

शोभितले एक साताअघि पालो सबैको आउँछ भन्दै अष्ट्रेलियाबाट फेसबुकमा स्टाटस लेखेका हुन्। 

उनले लेखेका छन्, ‘हामीले त धेरै चलचित्रकर्मीको ट्रेलर गीतलाई सपोर्ट गरेका थियौं। चाहे ढुकुटीवाला होस्, चाहे चिनावाला, चाहे ६४ वटा दाँतवाला। चाहे बोक्सी झाँक्रीवाला, चाहे प्रिमियरवाला होस्। पालो सबको आउँछ। सपोर्ट गरेका थियौं, अब विरोध पनि ढोल बजाएर गरिन्छ।’

उनले केही फिल्मकर्मीहरूलाई लक्षित गरेर लेखेको यो स्टाटसले निकै चर्चा पायो। तर, सामाजिक सञ्जालमा शोभितलाई समर्थन गर्ने कोही पनि थिएनन्। 

केही दिनअघि रञ्जना हलमा राखिएको फिल्मको ट्रेलर रिलिज कार्यक्रममा पत्रकारले सलोनलाई सोधे, ‘बुवा (शोभित) आफ्नो फिल्मलाई समर्थन नगरेको भन्दै रिसाउनु भयो, तपाईं आफैंले चाहिँ कतिको सपोर्ट पाएको महसुस गरिरहनु भएको छ?’ 

अभिनेता तथा प्रस्तुतकर्तासमेत रहेका सलोनले आफूले सबैबाट माया पाइरहेको दाबी गर्दै भने,‘मैले सँगै काम गरेका कति साथीहरूले शुभकामनाहरू पनि दिइरहनु भएको छ।’ 

उनले अगाडि भने, ‘ड्याडीले भनेको कुरा पनि ठिकै हो। उहाँ अलिक बढि एक्टिभ पनि हुनुहुन्छ। अरूको सिनेमालाई पनि आफ्नो सिनेमा सोचेर अगाडि बढ्नुहुन्छ। सय प्रतिशत अरूलाई दिएर आफूले २० प्रतिशत रिसिभ गर्दा नरमाइलो लाग्छ होला नि।’

बुवाले छोराका लागि माया देखाएको भन्दै सलोनले आफू असन्तुष्ट नरहेको र रिलिजको समयसम्ममा फिल्मकर्मीहरूले आफूलाई सपोर्ट गर्ने कुरामा विश्वस्त रहेको बताए। 

यही प्रश्न यस सलोनकी श्रीमती करिश्मा केसीलाई पनि सोधिएको थियो। जवाफमा उनले ससुरा बुबाको भनाइमा समर्थन जनाइन्।

आफूहरूले जति फिल्मकर्मीबाट सपोर्ट पाउनुपर्ने हो त्यो नपाएको उनको गुनासो छ। 

‘ड्याडीले हरेक मुभीहरू आउँदा सपोर्ट गरिराख्नु हुन्छ नि,‘ उनले भनिन्, ‘उहाँले उनीहरूबाट अपेक्षा राख्नु त स्वभाविकै हो। मैले अपेक्षा नै नगरेकोहरूबाट सपोर्ट पाइरहेको छु। तर अपेक्षा गरेकोहरूबाट भने पाउन सकेको छैन।’

यही फागुन २ बाट प्रदर्शनमा आउन लागेको यो फिल्मका अभिनेता सलोन बस्नेत, पूर्व मिस नेपाल तथा अभिनेत्री नम्रता श्रेष्ठ प्रमोसनमा दौडिरहेका छन्। उनलाई गायक तथा मोडल दुर्गेश थापाले समेत मेला-महोत्सवमा फिल्म प्रचारका लागि साथ दिइरहेका छन्।

सुरेश न्यौपानेको ‘डेब्यू’ निर्देशन रहेको फिल्ममा सलोन र नम्रताका अलावा, दिलीप रायमाझी, आयुषी ढकाल, उत्तम केसी,  सुमिन गुरुङ, र विशाल पहारीको अभिनय छ। 

फिल्मले बाबुछोरीको कथा देखाउने छ। यही फिल्मबाट सलोनकी श्रीमती करिश्माले निर्माताका रुपमा हात हालेकी हुन्। 

माघ २७, २०८१ आइतबार १४:०६:३४ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।