फागुन ३ देखि हुन लागेको इटहरी गोल्डकपमा ८ टीम सहभागिता, विजेतालाई १० लाख रूपैयाँ
इटहरी : १५ औं संस्करणको अन्तर्राष्ट्रिय आमन्त्रण इटहरी गोल्डकप फुटबल प्रतियोगिता आगामी फागुन ३ देखि हुने भएको छ।
आयोजक राष्ट्रिय जागृति क्लबले पत्रकार सम्मेलनको आयोजना गर्दै प्रतियोगिता आगामी फागुन ३ देखि १० सम्म हुने बताएको हो।
खेलकुद आयोजक समितिका संयोजक अनुरोध थापाका अनुसार प्रतियोगितामा एक विदेशी पाहुना टिमसहित नेपालका सात गरी आठ वटा टिमको सहभागिता रहनेछ। जसमा भारतको पाहुना टिम यूकेएफसीसहित मच्छिन्द्र फुटबल क्लब काठमाडौं, चर्च ब्वाइज यूनाइटेड काठमाडौं, झापा एघार फुटबल क्लब, आयोजक राष्ट्रिय जागृति, एनआरटी क्लब काठमाडौं, सगरमाथा युथ क्लब मोरङ र धरान फुटबल क्लबको सहभागिता रहनेछ।
प्रतियोगिताको उद्घाटन खेलमा आयोजक राष्ट्रिय जागृति क्लब र पाहुना टोली युनाइटेड कार्साङ फुटबल क्लब (युकेएफसी)बीच प्रतिस्पर्धा हुनेछ।
यसैगरी फागुन ४ मा सगरमाथा युथ क्लब मोरङ र न्यूरोड टिम काठमाडौं (एनआरटी)बीच प्रतिस्पर्धा हुनेछ। फागुन ५ मा मछिन्द्र फुटबल क्लब काठमाडौं र झापा ११ बीच प्रतिस्पर्धा हुनेछ भने फागुन ६ मा चर्च ब्वाइज युनाइटेड ललितपुर र धरान फुटबल क्लबबीच प्रतिस्पर्धा हुने तालिका रहेको छ।
आयोजकका अनुसार खेलको विजेता टिमले नगद १० लाख रूपैयाँसहित ट्रफी, मेडल र प्रमाणपत्र हात पार्नेछ भने उपविजेता टिमले पाँच लाखसहित ट्रफी, मेडल र प्रमाणपत्र पाउने छ।
विधागततर्फ सर्वोत्कृष्ट खेलाडीले एक लाख, प्रत्येक खेलको म्यान अफ दि म्याच हुने खेलाडीले १० हजार, उत्कृष्ट गोलरक्षक, उत्कृष्ट डिफेन्डर, उत्कृष्ट मिड फिल्डर, उत्कृष्ट स्ट्राइकर, उत्कृष्ट प्रशिक्षकले जनही २० हजार प्राप्त गर्नेछन्।
यसैगरी सर्वाधिक गोलकर्ता खेलाडीले नगद २५ हजार प्राप्त गर्नेछन् भने राइजिङ प्लेयरले एक थान एलइडी टिभी प्राप्त गर्ने छन्।
अघिल्लो १४ संस्करणको इटहरी गोल्डकप रात्रिकालीन समयमा भएता पनि यसपटक भने दिउँसोकै समयमा गरिने आयोजकले बताएको छ।
माघ २७, २०८१ आइतबार १०:५१:१५ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
