सुझाव आए प्रहरी विधेयक संशोधन गर्न सकिन्छ : गृहमन्त्री

काठमाडौं : प्रहरी नेतृत्व प्रहरी महानिरीक्षकबाट गृह सचिवमा लैजानेगरि प्रहरी र सशस्त्र प्रहरी विधेयक दर्ता भएसँगै आलोचन बढेपछि गृहमन्त्री रमेश लेखकले सुझावका आधारमा विधेयक संशोधन गर्न सकिने बताएका छन्। 

शनिबार काठमाडौंस्थित भृकुटीमण्डपमा नेपाल प्रहरी क्लबकाे भवन उद्घाटन समारोहमा उनले मन्त्रालयले नेपाल प्रहरी र सशस्त्र प्रहरी बल नेपालकाे ऐन संशोधनका लागि विधेयक संसद्मा दर्ता गरिएको र केही दिनमा विधेयकमाथि छलफल हुने बताए। 

संसदमा दर्ता भएको दुबै सुरक्षा संगठनको विधेयकमा निर्देशनसँगै नियन्त्रणको जिम्मेवारीसमेत गृह सचिवलाई तोकिएको छ। यसले सुरक्षा संगठनको चेन अफ कमान्ड सुरक्षा संगठनबाट निजामतीमा जाने र त्यसले प्रहरी परिचालनमै समस्या आउने भन्दै आलोचना भइरहेको छ। 

गृहमन्त्री लेखकले नीतिगत र कानुन सुधार गृह मन्त्रालयकाे पहिलाे काम भएको भन्दै विधेयकमा सुधार गर्नुपर्ने विषयमा सुझाव आए संशोधन हुनसक्ने बताए।

'नागरिकता सम्बन्धी विधेयक पनि संसदमा दर्ता भएको छ। अब चाँडै अध्यागमन सम्बन्धी ऐन संशोधनका लागि संसदमा लैजाने तयारी छ। निर्वाचन सम्बन्धी ऐन पनि अगाडि बढाएका छाैँ' उनले भने 'जग्गा प्राप्ति सम्बन्धी कानुन संशोधनकाे काम अगाडि बढेकाे छ। संघसंस्था सम्बन्धी नयाँ कानुन बनाउने काम अगाडि बढेकाे छ। बाँकी विधेयक पनि यसै संसद अधिवेशनमा पुर्याउछाैँ।' 

उनले नेपाल प्रहरी ऐन सम्बन्धी विधेयकमा सेवा प्रवेश र सेवानिवृत्तकाे कुरा सुनिश्चित गरेकाे र प्रहरीबाट आवश्यक सुझाव आए प्रहरी सम्बन्धी विधेयकलाई संशोधन गरेर जाने ठाउँ रहेको बताए। 

विधेयकमा भएको कमीकमजोरी संसदमा सच्याउन सकिने भन्दै बहस र छलफल सकारात्मक दृष्टिकोणबाट हुनुपर्ने उनको भनाई छ।  

माघ २६, २०८१ शनिबार १६:०७:४१ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।