महानगरका संस्थागत विद्यालयमा अब डिजिटल बोर्ड

काठमाडौँ : काठमाडौँ महानगरपालिकाले सामुदायिक विद्यालयमा प्रयोगमा रहेका ह्वाइट बोर्डको ठाउँमा अब डिजिटल बोर्ड प्रयोग गर्ने भएको छ। पहिलो चरणमा महानगरले ३ सय १३ थान डिजिटल बोर्ड वितरण गर्न लागेको हो।

शुक्रवार बसेको बैठकले शिक्षा विभागले सार्वजनिक खरिद प्रक्रियामार्फत प्राप्त गरेका वोर्डहरु सूचना प्रविधि विभागबाट बोलपत्रको स्पेशिफिकेसन सम्बन्धी प्राविधिक जाँच गराएर विद्यालयहरूमा वितरण गर्ने निर्णय गरेको हो।

बैठकले सहरी योजना आयोगका सदस्य इन्जिनियर शैलेन्द्र झाको संयोजकत्वमा संस्थागत विद्यालय वर्गीकरण तथा शुल्क प्रस्ताव समिति समेत गठन गरेको छ।

शिक्षा समितिका सदस्य एवं वडाध्यक्ष चिनीकाजी महर्जन, दिनेश महर्जन र विनोदकुमार राजभण्डारी समितिको सल्लाहकार छन्। आयोगका सहायक विज्ञ सस्मित पोखरेल, शिक्षा अधिकृत रुक्मिला इटनी, अभिभावक संघको अध्यक्ष वा सदस्य वा त्यस्तो संघ नभएमा अभिभावकहरूमध्ये २ जना मनोनीत, महानगरपालिका स्तरीय प्याब्सन, एनप्याब्सन, शिक्षा विभागको इन्जिनियर समितिको सदस्य छन्।

मापदण्डका आधारमा विद्यालयको वर्गीकरणको प्रारूप तयार पार्ने, शुल्क सम्बन्धी सिफारिस तयार पार्ने, शुल्क बमोजिम सेवा सम्बन्धी अवस्था अध्ययन गरेर शिक्षा समितिमा पेस गर्ने दायित्व समितिलाई दिइएको छ।

माघ २५, २०८१ शुक्रबार १९:५०:०२ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।