एलिना चौहानलाई अभिनेत्री ऋचाको सन्देश : तिम्रो आँटलाई म सलाम गर्छु

काठमाडौँ : अभिनेता पल शाह नाबालिग बालिका बलात्कारको घटनामा पक्राउ परे। ती नाबालिग चलचित्र क्षेत्रसँग समेत जोडिएकी गायिका थिइन्। अधिकांश चलचित्रकर्मीहरू मौन नै रहे। केही खुलेरै पीडकको पक्षमा खुले।

पल शाहको प्रशंसकहरू ती नाबालिगको चरित्र हरणमा सामाजिक सञ्जालमा सक्रिय थिए। ट्रोल र ह्यारेसमेन्ट थामिनसक्नु थियो। जसले बालिकाको पक्ष लियो उ पनि ट्रोलको सिकार हुने अवस्थामा पनि केही कलाकारहरू सामाजिक सञ्जालबाट ती बालिकाको पक्षमा खुलेका थिए। ती मध्ये एक थिइन् अभिनेत्री ऋचा शर्मा।

प्राय सामाजिक न्याय, विभेदबारे सामाजिक सञ्जालमा आफ्नो धारणा राखिरहन्छिन् शर्मा। विवाह गरेको एक वर्षभित्रै गायिका एलिना चौहान सम्बन्ध विच्छेदको निर्णयमा पुगिन्। उनले काठमाडौँ जिल्ला अदालतमा सम्बन्ध विच्छेदको निवेदन दिइन्। न उनले सम्पत्तिमा भाग खोजिन् न माना चामलै भराउनेतिर लागिन्। उनले केवल वैवाहिक सम्बन्धबाट स्वतन्त्रता मागिन्।

उनीबारे समेत सामाजिक सञ्जालमा छेडखानी, आलोचना र ट्रोलकोक्रम सुरु भयो। यसमा पनि अधिकांश चलिचित्रकर्मीहरु मौन नै छन्। तर अभिनेत्री ऋचा बोलिन्। उनी अभिनीत फिल्म सारङ्ग शुक्रवारबाट रिलिज भयो। फिल्म प्रमोशनकोबेलामा विवाद होला कि भनेर अन्य कलाकार डराउने गरेको देखिन्छ।

तर ऋचाले मनको भावलाई डरले मर्न दिइनन्। उनले फिल्म प्रमोशनकाक्रममा मिडियामा अन्तर्वार्ता दिँदा पनि सम्बन्ध विच्छेदमा पनि महिलामाथि नै प्रश्न उठ्ने तर पुरुषबारे केही नबोल्ने प्रवृत्ति रहेको भन्दै असन्तुष्टि जनाएकी थिइन्। शुक्रवार त उनले सामाजिक सञ्जाल फेसबुकमा एलिनालाई समर्थन गर्दै सानो सन्देश नै लेखिन्।

एलिनाले टिकटकमा एक भावुक गीतसहितको भिडियो राखेकी थिइन्। भिडियोमा उनी आँसु पुच्छदै गरेको देखिन्छ। एलिनाको त्यही भावुक भिडियो क्लिपसहित ऋचाले लेखिन् ‘तिमीले आफ्नो विवाह एक वर्षमै टुङ्ग्याउने निर्णय लियौ, र मलाई थाहा छ, यो सजिलो निर्णय थिएन। समाजले प्रश्न गर्यो होला, परिवारले चिन्ता व्यक्त गर्यो होला, र धेरैले तिम्रो निर्णय बुझ्न सकेन होला। तर म बुझ्छु किनभने तिमीले आफूलाई गुमाउन चाहेनौ।’

उनले एलिनाको निर्णयलाई सलाम गर्दै अगाडि लेखिन् ‘तिमीले जस्तो निर्णय लियौ, त्यसले तिमीलाई अझ बलियो बनाओस्। तिम्रो स्वर, तिम्रो सङ्गीत संसारभरि गुन्जिरहोस्। यदि कहिल्यै थाक्यौ भने, सम्झनू तिमी एक यस्ती साहसी आत्मा हौ जसले परम्परागत सिमानाहरू तोडेर आफ्नो बाटो आफैँ कोरिन्।’

ऋचाको यो आँटलाई पनि उकेराको सलाम।

एलिनालाई ऋचाले लेखेको पत्र

तिमीले आफ्नो विवाह एक वर्षमै टुङ्ग्याउने निर्णय लियौ, र मलाई थाहा छ, यो सजिलो निर्णय थिएन। समाजले प्रश्न गर्यो होला, परिवारले चिन्ता व्यक्त गर्यो होला, र धेरैले तिम्रो निर्णय बुझ्न सकेन होला। तर म बुझ्छु किनभने तिमीले आफूलाई गुमाउन चाहेनौ।

साँच्चै, सङ्गीत तिमीभित्र बाँचिरहेको थियो, तिमी त्यसैमा हराउन चाहन्थ्यौ। कसैले तिम्रो पखेटा काटेर घरको सानो खाँबोमा बाँध्न खोज्यो, तर तिमी उड्न चाहन्थ्यौ। विवाह एउटा सम्बन्ध हो, बाँधिनु होइन। जब सम्बन्धले तिमीलाई साँघुरो बनाउँछ, तिम्रो सपनालाई थिच्छ, तब त्यसलाई निरन्तरता दिनुको कुनै अर्थ हुँदैन।

तिम्रो आँटलाई म सलाम गर्छु। धेरै महिलाहरू समाजको डरले आफूलाई बिर्सेर अरूको चाहनामा बाँच्न बाध्य हुन्छन्। तर तिमीले आफूलाई चुन्यौ, आफ्ना सपनालाई चुन्यौ। सङ्गीत तिम्रो आत्मा हो, र तिमीले त्यसैलाई अँगाल्यौ।

तिमीले जस्तो निर्णय लियौ, त्यसले तिमीलाई अझ बलियो बनाओस्। तिम्रो स्वर, तिम्रो सङ्गीत संसारभरि गुन्जिरहोस्। यदि कहिल्यै थाक्यौ भने, सम्झनू तिमी एक यस्ती साहसी आत्मा हौ जसले परम्परागत सिमानाहरू तोडेर आफ्नो बाटो आफैँ कोरिन्।

तिम्रो साथमा,

ऋचा शर्मा

माघ २५, २०८१ शुक्रबार १८:३१:०७ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।