यौन कथाको फिल्म दुखी आत्माको स्क्रिप्ट पढ्दा दयाहाङ हच्किए, आँचल बनाउनुपर्छ भनेर तातिइन्

काठमाडौँ : यौन आफैँमा सबैभन्दा धेरै चासो जगाउने शब्द। समाचार, पुस्तक हुन् या फिल्म। यो सधैँ चर्चामै हुन्छ। तर सार्वजनिक बहसमा सधैँ खुसुरफुसुरमा सीमित।

नेपाली फिल्म क्षेत्रमा यसको अभ्यास नभएको हैन। तर विषयको उठान भन्दा पनि हल्ला गराउने उद्देश्यले कहिले बेडसिन त कहिले किस सिनमै सीमित हुँदै आएको छ।

कला पत्रकारिता हुँदै फिल्म निर्देशनमा हाम फालेका दीपेन्द्र लामाले यही विषयमा फिल्म बनाए ‘दुखी आत्मा’। यौन भन्ने विषयमा कतिको चासो हुने रहेछ भन्ने प्रमाण यही फिल्मको टिजर अनि ट्रेलरले पाएको अटेन्सनबाटै देखिन्छ।

सार्वजनिक भएका फिल्मको सामग्रीले यौन समस्या भएका एक पात्रले पाएको हैरानीमा फिल्म केन्द्रित छ भन्ने देखिन्छ। अर्थात् यो फिल्म यौनको विषय छुस्स छोएको हैन, पुरै यौन विषयमै केन्द्रित भएर बनेको हो।

सिन्धुलीको जुनार निकै चर्चित छ। लेखक तथा निर्देशक लामाले फिल्मको मुख्य पात्रबीच एक अर्काको शरीरको वर्णन गराउँदा त्यही जुनारलाई महिलाको स्तनसँग लगेर जोडेका छन्।

फिल्मका पात्र दयाहाङ हुन् या आँचल शर्मा र दिया मास्के सबैले यौन संवाद मजाले बोलेका छन्। कतै ठाडै संवाद छ त कतै साङ्केतिक। जति संवाद सार्वजनिक भएका छन् ती चर्चामै छन्।

तर फिल्मको नाम भने अनौठो राखेका छन् निर्देशकले। उकेराकर्मीले निर्देशक लामालाई फिल्मको नाम किन ‘दुखी आत्मा’ राख्नेको हो भन्ने जिज्ञासा राख्दा उनले फिल्मको कथा अनुसार नाम जुरेको बताउँछन्।

‘हाम्रो फिल्मको मुख्य पात्र छेवाङ लामा (दयाहाङ राई)को बाहिरबाट हेर्दा ठिकै देखिन्छन्। तर उनको शरीरमा एउटा ठुलो कमजोरी छ,समस्या छ। यो कुराले उसलाई पोलिरहन्छ। त्यस कारण उसको आत्म चाहिँ शान्त हुँदैन। उसको आत्मा दुखी छ। त्यसैको आधारमा फिल्मको नाम जुरेको हो,’ उनले भने।

फिल्मको ट्रेलर, टिजरमा प्रशस्तै द्धिअर्थी यौन शब्दहरू राखिएको छ। कतै यो फिल्म चलाउन निर्माता र निर्देशकले अपनाएको चलाखी मात्र त हैन? निर्देशक लामा फिल्मको कथा गम्भीर रहेको तर ठाडा शब्दहरू राख्दा दर्शकहरू हलसम्म आउन हच्किने हो कि भनेर कमेडी शैलीमा फिल्म निर्माण गरेको बताए।

‘नेपालमा अरू विषयमा फिल्महरू धेरै बनेका छन्। तर सिरियस विषयमा फिल्म बनेका छैनन्। सिरियस तथा संवेदनशील विषयमा फिल्म निर्माण गर्दा धेरै सिरियसली बनाइयो भने दर्शकमा खासै चासो नलाग्ने हुन सक्छ,’ उनले भने ‘दर्शक हलसम्म आउन नसक्ने खतरा हुन्छ। दर्शकलाई हलसम्म तान्ने कमेडी जनराको फिल्महरू नै हुन्। त्यही शैली अपनाएको छु।’

उनले साथीभाइहरूबिच भेट हुँदा दिअर्थी शब्द बोल्नु सामान्य रहेको भन्दै उनले संवादहरू भाइरल हुन या चर्चाका लागि मात्र नहालिएको तर्क गर्छन्।

उनले फिल्मको विषय यौन स्वास्थ्य सम्बन्धी रहेको र यसमा पुरुषको उत्तेजना,यौन अङ्ग कडा नहुने जस्ता समस्यामा केन्द्रित रहेको बताए।

‘मानसिक कारण,डिप्रेसन,एन्जाएटी,कुनै औषधीको साइड इफेक्टले,मधुमेह,कोलस्टोर,हर्मोन लगायत विभिन्न कारणले पुरुषहरूमा यौन समस्या देखिन्छ,’उनले भने ‘४० वर्ष माथिको पुरुषमा यो समस्या बढी देखिन्छ। यस्तो यौन स्वास्थ्य सम्बन्धी हलिउड,बलिउडमा पनि धेरै फिल्म बनिरहेका हुन्छन्। यौनिकतामाथि पनि फिल्म बनिरहेको हुन्छन्। हाम्रो नेपालमा भने अहिलेसम्म यसबारेमा फिल्म बनिरहेका छैनन्। मैले यसमा प्रयास गरेँ।’

स्क्रिप्ट पढ्दा अक्मकाए दयाहाङ

फिल्म प्रचारकोक्रममा अभिनेत्री आँचलले फिल्ममा बोलिएका संवाद र दृश्यहरू सामान्य नै रहेको बताउँदै आएकी छिन्। तर परिवारसँग बसेर हेर्ने कि नहेर्ने भन्ने निर्णय नगरिसकेको उनको तर्क थियो।

अभिनेता दयाहाङले यसलाई यौन स्वास्थ्यसँगै जोडेर व्याख्या गर्ने गरेका छन्। यसले कतै आँचल हिच्किचाएको अनि दयाहाङ भने कन्भिन्स भएको झैँ देखिन्छ।

तर निर्देशक लामाका अनुसार फिल्म निर्माणको प्रारम्भमा अवस्था उल्टो रहेछ। अभिनेता दयाहाङले  फिल्मको स्क्रिप्ट पढ्दा फिल्ममा काम गर्ने कि नगर्ने भनेर अन्कनाएको तर अभिनेत्री आँचलले फिल्म बनाउन आँट दिएको बताए।

उनले पहिला दयाहाङलाई कन्भिन्स गर्न गाह्रो भएको तर आँचलले भने त्यसो नगरेको बताए। 

‘दयालाई कन्भिन्स गराउन सजिलो भएन। फिल्मको स्क्रिप्ट पढिसकेपछि दुबिधामा थिए। कसो होला,के होला भन्नेमा थिए,’ उनले भने ‘तर यही स्क्रिप्ट आँचललाई दिँदा सजिलै लिइदिइनँ। पछिल्लो पुस्ताकी भएर पनि होला उनले सजिलै मेरो प्रस्तावलाई स्वीकार गरिनँ। दाइ बनाउनुपर्छ भनेर आफै तातिइन्।’

यस फिल्ममा अभिनेत्री दिया मास्के पनि छिन्। तर यसमा उनको सानो भूमिका रहेको निर्देशक लामाले बताए।

यो फिल्ममा दयाहाङ, आँचल, दियाका अलवा अनुप विक्रम शाही, बुद्धि तामाङ, रियर राई, पुष्कर गुरुङ, कविता आले लगायतका कलाकारहरूले अभिनय गरेका छन्। 

माघ २५, २०८१ शुक्रबार १६:३४:४१ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।