नेपाल प्रिमियर लिगको विवाद अदालतसम्म, शर्त विपरीतकाे काम नगर्न क्यानलाई अदालतको आदेश

काठमाडौं : जिल्ला अदालत काठमाडौंले जोरा स्पोर्ट्स इन्टरटेन्मेन्ट प्रालिसँगको करार शर्त विपरीतको काम कारबाही नगर्न/नगराउन नेपाल क्रिकेट संघ (क्यान)लाई अल्पकालीन अन्तरिम आदेश दिएको छ।

बुधबार जिल्ला न्यायाधीश दिनवन्धु बरालको एकल इजलासले मुद्दाको प्रारम्भिक सुनवाइ गर्दै जोरा स्पोर्ट्स इन्टरटेन्मेन्ट प्रालिसँगको करार शर्त विपरीतको काम कारबाही नगर्न/नगराउन नेपाल क्रिकेट संघ (क्यान)लाई अल्पकालीन अन्तरिम आदेश दिएको हो।

आदेशमा प्रतिवादी समेतलाई रोहवरमा राखी अन्तरिम आदेश जारी हुने/नहुने सम्बन्धमा फैसला गर्नु मनासिव हुने भन्दै फागुन १ गते छलफलको पेशी तोक्न भनिएको छ। इजलासले उक्त दिन छलफलको लागि उपस्थित हुन नेपाल क्रिकेट संघलाई जानकारी दिनसमेत भनेको छ।

नेपाल प्रिमियर लिगका सञ्चालनकर्ता जोरा स्पोर्ट्स इन्टरटेन्मेन्ट प्रालिका सञ्चालक आमिर अख्तरले क्यानले आफूसँग गरेको सम्झौता बमोजिमको अवधि बाँकी रहँदै करार उल्लङ्घन गरी नेपाल प्रिमियर लिग प्रतियोगिता आयोजना गरेको भन्दै मुद्दा दायर गरेका हुन्।

जोरा स्पोर्ट्सको तर्फबाट अधिवक्ता कमलेश द्धिवेदीले बहस गरेका थिए।

यसअघि अख्तर ‘नेपाल प्रिमियर लिग’ नामक फ्रेन्चाइज नेपाल क्रिकेट संघले आफ्नो नाममा १० वर्षका लागि सहमति गरेर दिएकोमा अरू नै कम्पनीमार्फत सञ्चालन गर्न लागेकाले लिग रोक्नका लागि रिट हाल्न सर्वोच्च पुगेका थिए।

सो समयमा उनले एनपीएल सर्वाधिकार आफू मातहत रहेको बारेमा क्यानलाई जानकारी गराउँदा समेत क्यानले वास्ता नगरेपछि मुद्दामा गएको बताएका थिए।

तर कात्तिक २५ गते सर्वोच्च अदालतका न्यायाधीश हरिप्रसाद फुयालको एकल इजलासले तत्काल लिग रोक्ने आदेश दिन अस्वीकार गर्दै क्यानलाई कारण देखाऊ आदेश जारी गरेको थियो।

पूर्वक्रिकेटर आमिर अख्तरले नेपाल प्रिमियर लिगको नाममा आफूले प्रतियोगिता सञ्चालन गर्दै आएको र यसको दर्ता पनि आफ्नै नाममा रहेको दाबी गर्दै आएका छन्।

माघ २४, २०८१ बिहीबार १३:१५:३९ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।