च्याम्पियन्स ट्रफीअघि अस्ट्रेलियन क्रिकेटर मार्कस स्टोइनिसद्वारा सन्यास घोषणा

एजेन्सी : अस्ट्रेलियन क्रिकेटर मार्कस स्टोइनिसले च्याम्पियन्स ट्रफीअघि एकदिवसीय क्रिकेटबाट सन्यास लिएका छन्।

यसको मतलब उनले दुई सातापछि हुने च्याम्पियन्स ट्रफीमा भाग लिने छैनन्। यद्यपि, उनी टी-२० क्रिकेटमा अष्ट्रेलियाली टोलीबाट खेल्न जारी राख्नेछन्।

३५ वर्षीय क्रिकेटरले बिहीबार एक पोस्टमार्फत भनेका छन्, ‘अस्ट्रेलियाका लागि एकदिवसीय क्रिकेट खेल्नु एक अविश्वसनीय यात्रा भएको छ। हरियो र सुनौलो मैदानमा बिताएका सबै क्षणहरूको लागि म आभारी छु।’

दक्षिण अफ्रिकामा भइरहेको एसए२० लिगमा डरबन सुपर जायन्ट्स टोलीको हिस्सा भएका उनलाई ह्यामस्ट्रिङमा चोट लागेको थियो।

सन्यास घोषणा गर्दै उनले लेखेका छन्, ‘उच्च स्तरमा मेरो देशको प्रतिनिधित्व गर्नु मेरो लागि सधैँ यादगार रहनेछ। यो सजिलो निर्णय थिएन तर मलाई लाग्छ यो मेरो लागि एकदिवसीय क्रिकेटबाट टाढा रहने र मेरो करियरको अर्को अध्यायमा पूर्ण रूपमा ध्यान केन्द्रित गर्ने सही समय हो। रोन (अस्ट्रेलियाली टोलीका प्रशिक्षक एन्ड्रयू म्याकडोनाल्ड) सँग मेरो राम्रो सम्बन्ध छ र म उनको समर्थनको साँच्चै कदर गर्छु। म पाकिस्तानमा केटाहरूको लागि हौसला प्रदान गर्नेछु।’

जनवरी १३ मा स्टोइनिसलाई च्याम्पियन्स ट्रफी खेल्ने अष्ट्रेलियाली टोलीमा समावेश गरिएको थियो। स्टोइनिस २०२३ को एकदिवसीय विश्वकप जित्ने अष्ट्रेलियाली टोलीको पनि हिस्सा थिए।

अष्ट्रेलियाका लागि ७१ एकदिवसीय खेल खेलेका उनले ब्याटिङतर्फ एक हजार ४९५ रन बनाउँदा बलिङतर्फ ४८ विकेट लिएका छन्।

क्रिकेट अष्ट्रेलियाले चाँडै नै उनको प्रतिस्थापनको घोषणा गर्नेछ। आईसीसीले टोली परिवर्तनको लागि फेब्रुअरी १२ लाई अन्तिम मिति तोकेको छ।

माघ २४, २०८१ बिहीबार १२:४१:२८ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।