‘एक्टर : टेक वान’ले हलमा दर्शक तान्न नसके पनि दिव्यालाई छैन घाटा, साइन गरिन् ‘माया प्रीति’
काठमाडौं : अमेरिका छाडेर नेपालमा फिल्म खेल्न आएकी नवअभिनेत्री दिव्या रायमाझीले लगातार २ वटा फिल्ममा काम गरिसकेकी छन्। गत शुक्रबारबाट प्रदर्शनमा आएको फिल्म ‘एक्टरः टेक वन’ र अर्को फिल्म ‘पिताम्बर’। फिल्म ‘एक्टर : टेक वान’ले दर्शक हलमा तान्न नसके पनि उनको चर्चा भने कम छैन।
दिव्याको अभिनयको खासै चर्चा छैन। तर, उनको लुक्सको बढी नै चर्चा चलिरहेको छ भने चर्चित अभिनेता दिलिप रायमाझीकी छोरी हुनु पनि उनको चर्चाको कारण हो।
दोस्रो फिल्म ‘पिताम्बर’ प्रदर्शनमा आउने तयारीमै रहँदै गर्दा दिव्या तेस्रो फिल्म ‘माया प्रीति’मा अनुबन्ध भएकी छन्। पहिलो फिल्मले नै बक्स अफिस खाली राखेपनि उनको व्यस्तता भने एकपछि अर्को बढेको देखिन्छ।
बुधबार उनलाई फिल्म ‘माया प्रीति’का निर्माण टिमका कार्यकारी निर्माता सन्तोष कुमार कार्की र क्रिएटिभ निर्देशक प्रणव जोशीले फिल्मका लागि आधिकारिक रूपमा अनुबन्ध गरेका छन्। यस फिल्ममा उनको मुख्य भूमिका रहने निर्माण पक्षले जानकारी दिएको छ।
यो फिल्ममा दिव्याको जोडी को हुने हुन् ? त्यो पनि उल्लेख गरिएको छैन। फिल्म ‘एक्टर : टेक वान’ र ‘पिताम्बर’मा दिव्यासँगै अभिनय गरेका प्रदीप खड्का हुन्छन् कि भन्ने अनुमान लगाइएको छ। किनभने प्रदीपकै सिफारिसमा उनले ‘एक्टर : टेक वान’मा काम गरेको हल्ला नचलेको हैन।
त्यसो त दिव्याले दुई वर्षअघि शिवहरी पौडेलको लेखन तथा निर्देशनमा बनेको फिल्म ‘लक्का जवान’मा अभिनय गर्न लागेको कुरो थियो। तर उनले त्यो फिल्ममा काम गरिनन्। उनका बुबा दिलिप रायमाझीले नै लगानी गरेको त्यो फिल्ममा उनको डेब्यु हुन सकेन। उनले पढाइलाई र समय नमिलेको बताएकी थिइन्।
जब उनले अमेरिका छाडेर नेपाली फिल्ममा काम गर्ने चासो देखाइन्, त्यसपछि उनका हातमा एकपछि अर्को फिल्म आउन थालेका छन्।
रोमान्टिक कमेडी कथामा निर्माण हुने भनिएको फिल्म ‘माया प्रीति’लाई अवि श्रेष्ठले निर्देशन गर्दैछन्। वन टू थ्री स्टुडियोज प्रालिको ब्यानरमा निर्माण हुने यस फिल्ममा अभिनेत्री निशा अधिकारी पनि कार्यकारी निर्माताको रूपमा रहनेछिन्।
यो फिल्म कहिलेबाट फ्लोरमा जाने हो भन्ने कुरालाई निर्माण पक्षले खुलाएका छैनन्।
फिल्मको कलाकार म्यानेजमेन्ट लिभेन्ट्स् स्टुडियोले गर्नेछ।
माघ २३, २०८१ बुधबार १७:१२:०१ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
