दयाहाङ भन्छन्- ‘दुखी आत्मा’मा अनुभव पनि गर्न नपाएको पात्रको भूमिका गर्नुपर्यो, पर्याप्त न्याय गर्न सकिँन

काठमाडौं : अभिनेता दयाहाङ राईले आउँदै गरेको फिल्म ‘दुखी आत्मा’ आफ्नो पात्रको भूमिका चुनौतीपूर्ण भएको बताएका छन्। 

बुधबार काठमाडौंमा फिल्म प्रमोशन गर्दै उनले अनुभव पनि गर्न नपाएको पात्रको भूमिका निभाउनु पर्दा आफ्नो लागि थप चुनौतीपूर्ण बनेको बताए। 

उनले भने, ‘मैले अनुभव पनि गर्न नपाएको पात्रको भूमिका कसरी निभाउने भन्ने कुरा नै मेरो चुनौती थियो। यो एडल्ट भन्नेबित्तिकै अर्कै विषयको फिल्म होकी भन्ने खालको सोच आउँछ, यसमा पहिलो चुनौती भनेको मैले यो पात्रलाई न्याय दिन सक्दिन जस्तो लागेकै हो। आजको दिनसम्म हेर्दा पनि मैले जति गरे त्यो पर्याप्त भयो जस्तो लागेको छैन।’

यौन स्वास्थ्य सम्बन्धी विषयवस्तु खुला रुपमा बहसमा नआउने हुँदा फिल्मले उक्त सन्देश दिन खोजेको उनको भनाई छ। 

उनले भने, ‘यो बारे बहस हुन जरुरी छ, हामीले मानसिक, शारीरिक स्वास्थ्यको विषयमा कुरा गर्न थालेका छौं तर यौन स्वास्थ्यको विषयमा हामी खुला भएर कुरा गर्न सकेका छैनौं। तर यस बारेमा चर्चा हुन जरुरी छ। बाहिर कुरा नगरे पनि परिवार, श्रीमान श्रीमतीबीच भए राम्रो हुन्छ।’

उनले फिल्ममा भएको समस्या संसार भर ७० प्रतिशत मान्छेको समस्या रहेछ भन्दै यो गम्भीर विषय भएको बताए।
 
उनले भने, ‘फिल्ममा भएको समस्या संसारभर ७० प्रतिशत मान्छेको समस्या रहेछ नी भनेपछि त यो गम्भीर विषय रहेछ, तर यसो हेर्दा त सबै मान्छे सामान्य नै देखिन्छन्। फिल्ममा भएको विषयवस्तु मानिसको चासोको विषय हो तर खुलेर कोही पनि कुरा गर्न मान्दैन। फिल्ममा अप्ठयारो मान्नु पर्ने दृश्य केही छैन।’ 

दयाहाङ राई, आँचल शर्मा, अनुपविक्रम शाहीको शीर्ष भूमिका रहेको यो फिल्म भ्यालेन्टाइन डेको अवसरमा फागुन २ देखि प्रदर्शनमा आउदै छ। 
 
दीपेन्द्र लामाले निर्देशन गरेको फिल्ममा बुद्धि तामाङ, पुस्कर गुरुङ, कविता आले, शिशिर वाङ्देल, आशान्त शर्मा, लोकेन्द्र लेखक, अंकित खड्का, लुनिभा तुलाधर, आरती आचार्य, निमा पाण्डे, रेअर राई, यासेली योङहाङ लगायतले पनि अभिनय गरेका छन्।

माघ २३, २०८१ बुधबार १६:४९:३४ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।