'जातीय हिंसामा संलग्न गृहमन्त्रीलाई बर्खास्त गर'

काठमाडौं : दलितका लागि दलित अभियानले गृहमन्त्री रमेश लेखकको राजीनामा माग गर्दै काठमाडौंको माइतीघरमा प्रदर्शन गरेको छ। 

मंगलबार नयाँपत्रिका दैनिकले गृहमन्त्री लेखकै निर्देशनमा अन्तर्जातीय प्रेम विवाह गरेका सर्लाहीका सत्येन्द्रकुमार रामलाई प्रहरीले पटक-पटक पक्राउ गरी थुनामा राखेको समाचार सार्वजनिक गरेको थियो। 

त्यसपछि आज माइतीघर मण्डलामा सत्येन्द्रकुमार राममाथि अत्याचार गरेको भन्दै गृहमन्त्री लेखकविरुद्व विरोध प्रदर्शन गरिएको हो। 

उनीहरूले 'दलित हिंसा गर्ने गृहमन्त्री राजीनामा दे, जातीय हिंसामा संलग्न गृहमन्त्रीलाई बर्खास्त गर, जातीय हिंसा गर्ने गृहमन्त्री मुर्दावाद' जस्ता प्लेकार्ड बोकेर प्रदर्शन गरेका थिए। 

दलित अधिकारकर्मी खगेन्द्र सुनारले सर्लाहीकै नेहा रौनियारसँग विवाह गरेका राममाथि गृहमन्त्रीले अत्याचार गरेको बताए। राज्यका निकायमा बसेका मान्छेले नै दलितमाथि अत्याचार गरेको उनको आरोप छ। 

सुनारले कांग्रेस पार्टी कार्यालय, दलित आयोगलगायतका निकायमा धर्ना दिने बताएका छन्। 

नयाँपत्रिकाका अनुसार रामविरूद्ध बालविवाहको मुद्दा दायर गरिएको र प्रहरीले उनलाई मुम्बईसम्म पुगेर पक्राउ गरेको थियो। 

अन्तर्जातीय विवाह छुटाउनकै लागि गृहमन्त्रीकै निर्देशनमा यसरी यातना दिइएको उनीमाथि आरोप छ। तर, गृहमन्त्री लेखकले भने त्यसमा आफ्नो संलग्नता नभएको दाबी गरेका छन्।

गृहमन्त्रीको बारेमा समाजमा भ्रम फैलाउने गरी भ्रामक समाचार प्रकाशन गरिएको भन्दै गृह मन्त्रालयले एक विज्ञप्ति जारी गरेर आपत्ति जनाएको छ। 

त्यसैगरी त्यसबारेमा प्रहरी प्रधान कार्यालयले पनि विज्ञप्ति निकालेर रामलाई बालविवाह मुद्दामा पक्राउ गरिएको र अदालतको आदेशमा ३० हजार धरौटीमा छुटी मुद्दा विचाराधीन रहेको भनेको छ।  

माघ २३, २०८१ बुधबार १६:३१:१० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।