महिला क्रिकेट टोलीको ड्रेसिङ रुममा ‘शीतयुद्ध’, मिडियामै पोखिए खेलाडी र प्रशिक्षकबीचको अन्तर्विरोध

काठमाडौं : ‘खेलाडीले अध्यधिक दबाब महसुस गर्दा मलेसियासँग हार व्यहोर्नुपर्यो।’

गतवर्ष फागुनमा मलेसियामा भएको एसीसी महिला प्रिमियर कपमा घरेलु टोलीसँग चार विकेटले पराजित भएपछि नेपाली राष्ट्रिय महिला टोलीका मुख्य प्रशिक्षक मनोज कटुवालले सार्वजनिक सञ्चारमाध्यममा दिएको अभिव्यक्ति हो यो।

मलेसियासँग पराजित हुँदा त्यतिबेला नेपालले एसिया कपमा छनोट हुने सुनौलो अवसर गुमाएको थियो। यद्यपि एसियन क्रिकेट काउन्सिलले आठ टिमलाई समावेश गर्ने भनेपछि नेपालले अन्तिम समयमा एसिया कप खेल्ने मौका पाएको थियो।

त्यतिबेला प्रशिक्षक कटुवालले नेपालको हारको प्रमुख कारण फिटनेस र फिल्डिङ भएको बताएका थिए।

त्यसको एक वर्षपछि घरेलु मैदानमा जारी नेदरल्यान्ड्स र थाइल्यान्डविरुद्धको सिरिजमा पनि नेपाली टोलीलाई उनै प्रशिक्षक कटुवालले नै सम्हाल्दैछन्। उनको नेतृत्वमा रहेको टोली थाइल्यान्ड र नेदरल्यान्ड्ससँग चार खेलमा पराजित भइसक्यो।

एक वर्षपछि घरेलु मैदानमा सिरिज हुँदा पनि प्रशिक्षक कटुवाल महिला टोलीको फिटनेस र फिल्डिङमै समस्या देख्छन्। चौथो खेलमा हारपछि सञ्चारकर्मीसँगको कुराकानीमा उनले नेपालको हारको प्रमुख कारण फिल्डिङ र फिटनेस भएको बताए।

‘नेपाली टोलीको कमजोरी भनेको फिल्डिङ र फिटनेस नै हो’, उनले भने, ‘हामीले क्याचहरु धेरै मिस गरिरहेका छौँ भने फिल्डिङका कारण रन गुमाइरहेका छौँ।’

एक वर्षअघि नै पत्ता लगाइसकेको टोलीको समस्या आजको दिनसम्म समाधान भइसक्नुपर्ने हो, तर प्रशिक्षक कटुवाल अझै पनि आजको भोलि समस्या समाधान नहुने रटान लगाइरहेका छन्।

एक वर्षअघि नै पहिल्याएको समस्या किन समाधान भएन भन्ने प्रश्नमा उनी खेलाडी खेलाडीतर्फ औँला तेर्स्याउँछन्। खेलाडीले क्याम्पमा मात्र नभएर घरमा पनि अभ्यास गर्नुपर्नेमा उनको जोड छ।

०००

गतवर्ष एसीसी महिला प्रिमियर कपमा मलेसियासँग पराजित भएपछि नेपालले आजसम्म आठ वटा मात्र टी२० अन्तर्राष्ट्रिय खेल खेल्यो। त्यसमा नेपालले मात्र एउटा खेलमा जित निकाल्यो, त्यो पनि तुलनात्मक रुपमा कमजोर मानिएको युएईमाथि।

मलेसियासँग पराजित भएपछि नेपालले एसिया कपमा युएईलाई ६ विकेटले पराजित गर्दा सोही प्रतियोगिताममै पाकिस्तानसँग नौ र भारतसँग ८२ रनले पराजित भयो।

त्यसपछि अहिले कीर्तिपुरमा जारी टी२० सिरिजको पहिलो खेलमा नेपाल नेदरल्यान्ड्ससँग २० रनले पराजित हुँदा दोस्रो खेलमा थाइल्यान्डसँग चार विकेटले पराजित भयो। तेस्रो खेलमा नेदरल्यान्ड्ससँग १५ रनले हारेको नेपाल चौथो खेलमा थाइल्यान्डभन्दा पाँच रनले कम हुन पुग्यो।

‘पशुपतिनाथलाई कोच राख्दा पनि जित्छजस्तो लाग्दैन’
लगातारको हारपछि नेपाली राष्ट्रिय टोलीमा अब विवाद र असन्तुष्टि बढ्न थालेको छ। कप्तानले प्रशिक्षक परिवर्तनको कुरा गर्न थालेकी छन् भने प्रशिक्षकले फिटनेस नभएका खेलाडीलाई टोलीबाट हटाउनुपर्ने बताउँछन्।

राष्ट्रिय टोलीकी कप्तान इन्दु बर्माले महिला टोलीका लागि विदेशी प्रशिक्षक ल्याउन ढिला भइसकेको बताउँदै नयाँ प्रशिक्षक आए अझै सुधार गर्नसक्ने आधार रहेको बताइन्।

‘विदेशी प्रशिक्षक ल्याउँदा एकदमै राम्रो हुन्छ, हामीलाई फिटनेस ट्रेनरको पनि एकदमै धेरै आवश्यक छ। क्यानलाई पनि हामीले बारम्बार भनिरहेका छौँ। केही समयपछि त्यो फुलफिल होला।’

खेलाडीले विदेशी प्रशिक्षकको माग गरिरहँदा मुख्य प्रशिक्षक कटुवाल भने त्यसमा सहमत छैनन्। उनी नेपाली खेलाडीमै समस्या रहेको दोहोर्याइरहन्छन्।

‘अहिले नै विदेशी कोच भन्दा पनि खेलाडीहरूले क्याम्पको अभ्यासमा मात्र भर पर्न हुँदैन। घरमा पनि मिहिनेत गर्नुपर्छ,’ उनले भने, ‘घर गएपछि सुतेर खाएर बस्ने अनि क्याम्पमा आएर विदेशी कोच खोज्ने? विदेशी कोच मात्र होइन, फिल्डिङ र फिटनेस नसुधारेसम्म पशुपतिनाथ स्वयंलाई कोच राख्दा पनि जित्छजस्तो लाग्दैन।’

उनको यो अभिव्यक्तिले एक वर्षभन्दा लामो समय आफूले प्रशिक्षण गरेको टोलीमाथि प्रशिक्षकको विश्वासलाई देखाउँछ। उनलाई अहिलेकै अवस्थामा नेपाली टोलीले थाइल्यान्ड र नेदरल्यान्ड्सलाई हराउन नसक्ने आशय समेत स्पष्ट रुपमा राखे।

प्रशिक्षकले बल्ल स्वीकारे-‘उनीहरू हामीभन्दा एक स्टेप माथि छन्’
दोस्रो खेलमा थाइल्यान्डसँगको हार व्यहोर्दा टी२० म्याचमा मैदानमा आएपछि दुवै टोली बराबर रहेको बताएका प्रशिक्षक कटुवालले चौथो खेलमा हार व्यहोर्दा भने थाइल्यान्ड र नेदरल्यान्ड नेपालभन्दा माथि रहेको स्वीकार गरेका छन्।

उनले भने, ‘थाइल्यान्ड र नेदरल्यान्ड राम्रो टोली हो, हामीभन्दा एक स्टेप माथि नै छ उनीहरू। लगातार चार हार भनेको सानो कुरा होइन। यद्यपि नेपाली टोलीमा सुधार भने भएको छ।’

दोस्रो खेलमा पराजित भएपछि उनले भनेका थिए, ‘रेकर्ड र र्याङ्कि भनेको विगत हो, टी२० म्याचमा फिल्डमा आएपछि दुईटै टोली बराबर हुन्छ।’

अन्त्यमा, टिमको क्याप्टेन र मुख्य प्रशिक्षकको एकअर्काबीच परस्पर विरोधी अभिव्यक्तिले ड्रेसिङ रुमभित्रको माहोल सहज छैन भन्ने देखाउँछ। खेलाडीले प्रशिक्षकप्रति र प्रशिक्षकले खेलाडीप्रति सार्वजनिक सञ्चारमाध्यमबाटै असन्तुष्टि व्यक्त गरिरहेका छन्। यसले खेलको हितका लागि कत्ति पनि सहयोग गर्दैन।

मुख्य प्रशिक्षकको एक वर्षको करार सम्झौता सकिनै लाग्दा उनले खेलाडीलाई आफूले आफैँलाई सुधार गर्नुपर्ने सुझाव दिएका छन्। क्याम्पमा मात्र नभएर घर बस्दा पनि अभ्यास गर्दा त्यसले आफ्नो वृत्ति र विकाससँगै राष्ट्रको लागि पनि सहयोग पुग्ने धारणा राखे।

माघ २३, २०८१ बुधबार ११:२५:१७ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।