‘घर ज्वाइँ’ टिमले निर्माण गर्ने ‘मितज्यू’मा दयाहाङ र मिरुना दोहरिने सम्भावना कति?
काठमाडौं : यस वर्ष दयाहाङ राई र मिरुना मगर अभिनित फिल्म ‘घर ज्वाइँ’ले राम्रै कमाई गर्यो। फिल्मको कथावस्तुभित्र रहेको रोधी बसेको कुरालाई कास्कीका गुरुङ समुदायले आपत्ति जनाएका थिए। अनेक विवाद र झमेलामा परेको यो फिल्मले अन्ततः ५१ औँ दिन मनाउन सफल भयो।
यो फिल्म हलमा ५१ दिन मनाउँदा ६ करोड भन्दा माथि कलेक्सन गरेको यस फिल्मका निर्माता जनक घर्ती मगरको दाबी रह्यो।
यही टिमले अर्को वर्ष चैत २७ बाट प्रदर्शनमा आउने गरि अर्को फिल्मको घोषणा गरेका छन्। सोमबार बसन्त पञ्चमी अर्थात् सरस्वती पूजाको अवसर पारेर जनक घर्ती मगरको लगानी र अनिल बुढा मगरको निर्देशनमा फिल्म ‘मितज्यू’को घोषणा गरेका हुन्। उनीहरुको यो दोस्रो सहकार्य हो।
निर्माण टिमले फिल्मको पेन्टिङ थिम पोस्टर सार्वजनिक समेत गरेका छन्। जसमा दुई पात्रलाई सामान ओसारपसार गर्ने भ्यानका अगाडि हातको पञ्जा जुधाई रहेको देख्न सकिन्छ। भ्यानको माथि खसी र खसीको टाउकोमा कुखुराको भालेलाई राखिएको छ। थिम पोस्टरबाट यि दुई व्यक्ति व्यापारी हुन् कि भन्ने अनुमान लगाउन सकिन्छ।
निर्माता र निर्देशक दोहोरिदा यस फिल्मका कलाकार दोहरिने सम्भावनाबारे फिल्मका निर्माता जनक घर्ती मगरले केही कलाकार दोहरिने सम्भावना रहेको बताए। उनले उकेरासँगको कुराकानीमा मेन कलाकारहरू दोहरिन सक्ने सम्भावना रहेको र कुराकानी भइरहेको बताए।
‘सबै कलाकार दोहरिने भन्ने छैन। केही कलाकारहरू ‘घरज्वाइँ’कै रहनुहुनेछ,’ उनले भने, ‘यसका बारेमा छलफल गरिरहेका छौं।’
दोस्रो पटक निर्देशकको जिम्मेवारी पाएका निर्देशक अनिल मगरले पनि फिल्म ‘घरज्वाइँ’लाई दर्शकले अपार माया गरिदिएपछि दोस्रो फिल्ममा लागेको जानकारी दिए।
बुझिएअनुसार ‘घर ज्वाइँ’ कै मुख्य कलाकार दयाहाङ राई, मिरुना मगर लगायतको टिम यस फिल्ममा पनि दोहरिने सम्भावना छ।
जिएम मूभिज प्रोडक्सन र एबीएम सिने प्रोडक्सनको ब्यानरमा निर्माण हुने यो फिल्मको कास्ट एण्ड क्रिउको बारेमा जानकारी दिँदै जाने निर्माता जनक घर्ती मगरले जानकारी दिए। फिल्ममा महेश राईको लेखन, धन बहादुर राईलाई प्रोडक्सन कन्ट्रोलरको जिम्मा दिइएको छ।
यो फिल्मलाई नेपाल भर आरआर फिल्मस्ले वितरण गर्ने निर्माण पक्षको भनाई छ।
माघ २१, २०८१ सोमबार १७:२१:२३ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
