त्रिकोणात्मक महिला ट्वान्टी-२० मा तेस्रो खेल पनि गुमायो नेपालले

काठमाडौँ : त्रिकोणात्मक महिला ट्वान्टी-२० क्रिकेट शृङ्खलामा नेपाल नेदरल्यान्ड्सँग पराजित भयो। आइतबारको खेलमा नेदरल्यान्ड्सले नेपाललाई १ सय ४१ रनको चुनौती दिएको थियो। नेपालले ८ विकेट गुमाएर १ सय २५ रन मात्र बनाएर १५ रनले पराजित भयो।

त्रिकोणात्मक महिला ट्वान्टी–२० क्रिकेट शृङ्खलाको पहिलो खेलमा नेपाल नेदरल्यान्ड्ससँग २० रनले पराजित भएको थियो। थाइल्यान्डसँगको दोस्रो खेल ४ विकेटले गुमाएको नेपालले नेदरल्यान्ड्सको तेस्रो खेल पनि हार्यो।

आइतबारको खेलमा नेपालकी कप्तान इन्दु बर्माले सर्वाधिक ३० रन बनाएकी थिइन्। उनले ३२ बलको समना गरेकी थिइन्। सम्झना खड्काले २५ बल खेल्दै २३ रन बनाइन्। उनले ४ चौका प्रहार गरेकी थिइन्।पूजा महतोले १८ बलमा १ चौकासहित १८, कविता जोशीले १५ बलमा १४ र सीता राना मगरले ६ बलमा १० रन बनाएर अविजित रहिन्।

नेदरल्यान्ड्सकी आइरिस विलिङ, क्यारोलिन डि लाङ्गे र हिथर सिगर्सले २–२ र इभा लिन्च र इसाबेल भान डेर वोनिङले १–१ विकेट लिएका थिए।

टस जितेर पहिला ब्याटिङ रोजेको नेदरल्यान्ड्सले ९ विकेट गुमाएर १ सय ४० रन बनाउँदै नेपाललाई जितका लागि एक सय ४१ को चुनौती दिएको थियो।

नेदरल्यान्ड्सकी कप्तान बाबेट डी लिडेले सर्वाधिक ४१ रन बनाइन्। उनले ३८ बलको सामना गर्दा ४ चौका र १ छक्का प्रहार गरेकी थिइन्। हिथर सिगर्सले २३ बलमा २६, फेबे मोल्केनबोइर र रोबिने रिज्केले २१-२१ रन बनाएका थिए।

बलिङतर्फ नेपालको सीताले ५ विकेट लिएकी थिइन्। मनीषा उपाध्यायले २ र कविता जोशी र कप्तान इन्दु बर्माले १–१ विकेट लिएका थिए। प्रतियोगिता टीयू अन्तराष्ट्रिय क्रिकेट मैदानमा भइरहेको छ।

माघ २०, २०८१ आइतबार १८:११:२० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।