जाँदाजाँदै क्रिकेट प्रशिक्षक मोन्टीको सन्देश : सपना बोकेका छौ, जमिनमा खुट्टा राख

काठमाडौं : नेपाली क्रिकेट टोलीका मुख्य प्रशिक्षक मोन्टी देशाईले आफ्नो कार्यकालका लागि नेपाली क्रिकेटसँग जोडिएका सबैलाई धन्यवाद दिएका छन्।

उनले सामाजिक सञ्जालमा भावुक शैलीमा स्टाटसमार्फत् आफ्ना लागि यी दुई वर्ष निकै अविस्मरणीय भएको बताउँदै यो समय विभिन्न मनमोहक क्षणहरू र कोसेढुङ्गाहरूले भरिएको भनेका छन्।

उनले यस स्टाटसको सुरुवातमा नै ‘यो बिदाइ होइन, हार्दिक धन्यवाद हो’ भनेका छन्।

क्यानले  मोन्टीसँगको दुई वर्षको सम्झौता सकिएसँगै सम्झौता नवीकरण नगर्ने निर्णय गरेको थियो।

उनले त्रिवि क्रिकेट मैदानमा एसीसी प्रिमियर कप फाइनलमा दर्शकहरू छाता ओढेर खेल हेर्न बसेको क्षणदेखि मूलपानीमा टी-२० विश्वकप छनोटको निर्णायक खेल हुँदाको क्षण सम्झिए।

देशाईले भनेका छन्, ‘यी दुई वर्ष अविस्मरणीय रहे, जसमा अमूल्य क्षणहरू र साझा उपलब्धिहरू संकलन भए। टीयू मैदानमा भएको एसिया कप छनोट, जहाँ समर्थकहरू रुखमा चढे, छातामुनि उभिए र मूलपानीमा विश्वकप छनोटको त्यो उर्जाले भरिपूर्ण माहौलले नेपालको क्रिकेट प्रेम र दृढता परिभाषित गर्यो।’

आफ्नो प्रशिक्षणमा विभिन्न उत्तारचढावहरू रहेपनि आफूलाई दिइएको भूमिका निर्वाह गर्न पाउँदा उनले क्यान व्यवस्थापन, खेलाडीहरू, समर्थकहरू, ग्राउन्ड्सम्यान, कमेन्टेटर र कप्तान रोहित पौडेलप्रति कृतज्ञता व्यक्त गरे।

खेलाडीहरू लाई लक्षित गर्दै उनले लेखे 'लाखौँको सपना बोकेका छौ। जमिनमा खुट्टा राख, वन बल ब्याटल  मानसिकतालाई अँगाल्नु, र सीमाहरू तोड्नेक्रम जारी राख्नु।' 

वान बल ब्याटलको मानसिकता अपनाउन, सधैं आफ्ना दायरालाई बढाउँदै लैजान, सम्बन्धमा बनिएको ह्याप्पी ड्रेसिङ रुमको सिद्दान्त, खुलापन, एकता र उत्तरदायित्त्वको संस्कृति तपाईंहरूको सबैभन्दा ठूलो शक्ति हुने उनले लेखेका छन्।

आफूलाई प्रशिक्षकको जिम्मेवारी दिएकामा क्यानलाई पनि उनले धन्यवाद दिएका छन् भने जुनसुकै अवस्थामा पनि नेपालको समर्थन गर्न नछाड्ने समर्थकहरूलाई यो विश्वास कायमै राख्न अनुरोध गरेका छन्। 

माघ २०, २०८१ आइतबार ११:५५:४२ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।