नेपालले थाइल्यान्डलाई दियो मध्यम तर कीर्तिमानी लक्ष्य
काठमाडौं : त्रिदेशीय महिला टी२० सिरिजको आफ्नो दोस्रो खेलमा नेपालले थाइल्यान्डलाई मध्यम तर कीर्तिमानी लक्ष्य दिएको छ।
त्रिवि क्रिकेट मैदानमा टस जितेर पहिला ब्याटिङ रोजेको नेपालले निर्धारित २० ओभरमा नौ विकेटको क्षतिमा १०१ रन बनायो। योसँगै थाइल्यान्डले १०२ रनको लक्ष्य पाएको छ।
थाइल्यान्डविरुद्ध नेपालले बनाएको यो सबैभन्दा धेरै रन हो। यसअघि २०१९ फेब्रुअरीमा बैंककमा भएको टी२० खेलमा नेपालले थाइल्यान्डविरुद्ध आठ विकेट गुमाएर ६७ रन बनाएको थियो।
आजको खेलमा नेपालका लागि कविता कुँवर र बिन्दु रावलले समान २५-२५ रन बनाउँदा कप्तान इन्दु बर्माले १५ रन जोडिन्। त्यसबाहेक कुनै पनि खेलाडीले दोहोरो अंकमा रन जोड्न सकेनन्।
थाइल्यान्डका लागि थिपाथ्चा पुथावाङले तीन विकेट लिँदा नथाया बुचाथाम र पान्निता मायाले समान दुई–दुई विकेट लिए।
अब थाइल्यान्डले केहीबेरमा जवाफी ब्याटिङ गर्नेछ।
जारी प्रतियोगितामा थाइल्यान्ड सबैभन्दा बलियो टोली हो। महिला टी२० वरीयतामा थाइल्यान्ड १३औं स्थानमा हुँदा नेपाल २०औं स्थानमा छ। नेदरल्यान्ड्स भने १६औं स्थानमा छ।
जारी सिरिजको आफ्नो पहिलो खेलमा नेपाल नेदरल्यान्ड्ससँग २० रनले पराजित भएको थियो।
माघ १९, २०८१ शनिबार १३:५०:४० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
