अष्ट्रेलियाविरुद्ध १६५ रनमा समेटिएपछि श्रीलंकाले पायो फलोअन
काठमाडौं : पाहुना टोली अष्ट्रेलियाविरुद्धको पहिलो टेस्टको आफ्नो पहिलो इनिङमा श्रीलंका १६५ रनमा समेटिएको छ।
तेस्रो दिनको सुरुवातमा ४५ मिनेट ब्याटिङ गरेको श्रीलंकाले पाँच विकेट गुमाउँदै १६५ रनमा समेटिएको हो। यो अवस्थामा अष्ट्रेलिया ४८९ रनले अगाडि छ।
श्रीलंकाका लागि दिनेश चन्डिमालले ७२ रनको अर्धशतकीय पारी खेले। धनन्जय डी सिल्भा २२, कुशल मेन्डिस २१ र कामिन्दु मेन्डिस १५ रनमा समेटिँदा अन्य खेलाडीले दोहोरो अंकमा रन जोड्न सकेनन्।
अष्ट्रेलियाका म्याथू कुन्हेम्याले पाँच विकेट लिँदा न्याथन लायनले तीन र मिचेल स्टार्कले दुई विकेट लिए।
योसँगै अष्ट्रेलियाले श्रीलंकाका लागि फलोअन इन्फोर्स गरेको छ।
पाँच दिनको टेस्टमा पहिलो ब्याटिङ गरेको टोली र दोस्रो ब्याटिङ गर्ने टोलीबीचको रन दुई सय रनभन्दा बढी भएमा पहिलो ब्याटिङ गर्ने टोलीले दोस्रो ब्याटिङ गर्ने टोलीलाई फलोअन इन्फोर्स गर्नसक्छ। अब श्रीलंकाले पुनः ब्याटिङ गर्नेछ।
४८९ रनले पछि परेको श्रीलंकाले उक्त रनभन्दा बढी अष्ट्रेलिया लक्ष्य पाएर ब्याटिङ गर्नेछ भने रनभन्दा पहिला नै श्रीलंका आउट भएमा अष्ट्रेलियाले खेल एक इनिङभन्दा बढीले जित्नेछ।
श्रीलंकाको गल्ले क्रिकेट स्टेडियममा टस जितेर पहिला ब्याटिङ गरेको अष्ट्रेलियाले ६५४ रन बनाएको थियो। उसका लागि उस्मान ख्वाजा एक्लैले २३२ रन बनाउँदा कप्तान स्टिभ स्मिथले १४१ र डेब्यु गरेका खेलाडी जोस इङ्गिसले १०२ रन जोड्दै शतकीय पारी खेलेका थिए।
त्यसका अलावा ट्राभिस हेडले ५७ रनको अर्धशतकीय पारी खेल्दा एलेक्स केरीले ४६ रन नटआउट खेलेका थिए।
माघ १९, २०८१ शनिबार ११:०५:५५ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
